Nongpoh, Naitung 25: Halor ka thong jong ka sorkar ban kyntiew ïa ki jingpynmih ïa ki mar rep bad ban kyrshan ïa ka ïoh ka kot ki nongrep ka jylla, ka Dr. Ampareen Lyngdoh kum ka myntri ka tnad Agriculture ha ka sngi Palei ki la shim ïa ka bynta kum ka kongsan ban sam ïa ki symbai ‘Cardamom’ sha ki nongrep ka Ri Bhoi lyngba ki lad jingïarap ka CM Farm Plus.
Ïa kine ki symbai Cardamom la sam ha ka jingïalang kaba la pynlong ha Parish Hall, Nongoh ha kaba la shim bynta da ka Dr. Ampareen Lyngdoh kum ka kongsan bad u MLA ka Nongpoh u Bah Mayral Born Syiem kum u symbut kongsan bad la sakhi lang ruh da ka jingdon lang ka Kong Balakyntiew Ranee ADC ka Ri Bhoi, ka Kong B.M Umlong, Director ka tnat Horticulture bad kiwei kiwei nalor ki nongrep ka Ri Bhoi.
Haba kren ha kane ka sngi kum ka kongsan, ka Dr. Ampareen Lyngdoh ka la pynshai halor ka thong jong ka CM Farm Plus, ba ka dei kawei na ka lad jingïarap sha ki nongrep ban ïarap kyrpang ïa ki nongrep da kaba pynbiang ïa ki symbai bapher bapher ha ka por kaba biang na ka bynta ki nongrep.
Ka la long ruh lyngba kane ka CM Farm Plus ka jingthmu ka sorkar kam dei tang ban kyntiew ïa ki nongrep ha ki kam rep kam riang bad ka thong ruh ka long ba ki nongrep kin ïoh jingmyntoi ym tang shi por bad kin ïoh jingmyntoi pateng la pateng.
Ha kane ka sngi, la ai jingkren ruh da u MLA ka Nongpoh, u Bah Maral Born Syiem ha kaba u la ai khublei kyrpang ïa ka sorkar bad kumjuh ruh ïa ka myntri ka tnad Agriculture bad u kyrmen skhem ruh ba da ka jingïatrei lang na baroh ki liang kane kan ai jingmyntoi shibun ïa ki nongrep ha kane ka District bad ha ka jylla hi baroh kawei.
