Na ka RDSS kyntu u MLA Mawkynrew ïa u Mondal ban pynthikna bording ha ki 10 thaiñ ka Constituency

Shillong, Naitung 23 : U Bah Banteidor Lyngdoh, MLA ka Mawkynrew, u la aiti da ka jingthoh sha u Myntri Sorkar Jylla ba dei khmih ïa ka tnad pynmih bor ding elektrik, u AT Mondal ryngkat ka jingkyntu ba un tuklar lem ha ka ban pyntreikam noh da ka skhim Revamped Distribution Sector Scheme (RDSS), ha ki 10 tylli ki thaiñ ba kongsan kiba hap Mawkynrew Constituency khnang ba ki paidbah kin ïoh ïa ka bording kaba biang bad ba thikna.
Ha dorkhas sha u Myntri ha ka 23 tarik u Naitung, 2025, u Bah Banteidor u la kdew halor a jingdonkam ka thaiñ Mawkynrew ïa ka bording elektrik kaba thikna namar ka jingïai bteng ka jingbym ïoh bording bad ka jinglip bording kaba neh da ki kynta bad ki sngi ruh kumjuh.
Kat kum ka dorkhas, u Bah Banteidor ula pynpaw ba ki daw tynrai ka jingthut ka bording ka paw ba ka dei na ka jingsniew jongki transformer na ka por sha ka por ha ki shnong bapher bapher. U ong ba wat hadien bala bujli ïa ki transformer, kiba thymmai ruh ki ju sniew noh tang khyndiat por, kaba lam sha ka jingeh hapdeng ki paidbah.
Ula ong ba kane ka jinglong jingman kala pynsyllang bha ïa ka jingim ba man ka sngi jong ki paidbah khamtam ki khynnah skul, samla pule, ki briew bala noh rta bad ki dukan kiba donkam bha ïa ka bording elektrik.
U Bah Banteidor ula kyntu ïa u Myntri ban phah wad bniah ïa ka jingbha, ka jinglah kit bad ka jingpyndait ïa ki transformer ba la wanrah ha ki thaiñ bapher bapher ban pynkhlaiñ ïa ki jingtei jong ka tnad pynmih bording ban pynthikna ïa ka jingshngaiñ ka rukom sam bording ha ka thaiñ.
U Bah Banteidor, ula kdew ba ki 10 tylli ki thaiñ hapoh ka constituency ki dei kiba shah ktah jur eh bad namar kane, ula phah tuklar ban pyntreikam noh daka Revamped Distribution Sector Scheme (RDSS), kaba thmu ban pynjanai bad ka jingsam biang ïa ka bor ding ha ki jaka sor bad jaka nongkyndong.
Ula pyntip ba kine ki thaiñ ki kynthup ïa ka thaiñ Thangsning, Thynroit, Mawlyngot, Jongksha, Kharang, Jatah Lakdong, Nohron, Lynshing, Mawlat bad Laitkyrhong. U MLA ula pynpaw ïa ka jingkyrmen ba hapoh ka jingïalam u Myntri, ka thaiñ kan ïoh ïaka jingkyrshan ha ki kam kiba donkam kyrkieh.