Nongpoh, Naitung 25: Uwei u samla pule u ba dang pule ïa ka MSc 4th Semester, u Nayan Teron na ka tnad Botany jong ka skulbah University of Science & Technology Meghalaya (USTM), da ka jingjop u la lah ban pynmih ïa kawei ka jait shampoo kaba la shna tang da ki jingthung kiba la shem hapoh katei ka skulbah. Ïa katei ka jingjop bad ka jingwad bñiah la lah ruh ban leh hapoh ka jingïalam jong ka Dr. Mautushi Das, Associate Professor, Department of Botany jong ka skulbah USTM.
Katei ka project bala leh da utei u samla ka long ruh ban kham pynleit jingmut da kaba pyndonkam ïa ki kynja jingthung kiba la ithuh bad tip bha na ka bynta ban kyntiew ïa ka jingkoit jingkhiah jong u shniuh. Kum shi bynta jong ka jingpule, u Nayan u la pynlong ïa ka jingwad bñiah kaba bñiah ia ki jait jingthung bapher bapher ha ki sawdong sawkun jong ka mariang kaba don hapoh katei ka skulbah, da kaba pynshong nongrim lyngba ki jingshem jong ki riewstad bad ka jingbishar bñiah ïa ki kot, la jied katto katne ki kynja jingthung kiba lah ban pynbha bad pynkhlaiñ ïa u shniuh.
Ïa kitei ki jait jingthung pat la shna bad pynkylla sha ka shampoo da kaba pyndonkam da ka jingstad saian, ha kaba ka jingpynmih ba khatduh hadien bala dep bishar bñiah ka la long kaba jop naduh ka jingpynkhuid ïa u shñiuh, ka jingïada na u thyllieh, bad khamtam ka jinghap shñiuh.
Lyngba katei ka jingjop jong u tei u samla ban pynmih ïa katei ka jait shampoo, ka long shisha ka jingkmen bad pynpaw ruh ka jingriewspah ha kaba ïadei bad ki jait jingthung bapher bapher kiba don tang ha phyllaw bad ki sawdong sawkun jong katei ka skulbah.
