Jowai, Naitung 25: Ka kong L. Khynriam ha ka Dorbar Lyiur jong ka Jaiñtia Hills Autonomous District Council (JHADC) kaba la long ha ka sngi Palei, ka la buh jingkylli kaei ka daw ba pynlong ïa ka council ban suki palat ka rukom issue ïa ki Land Holding Certificate (LHC), hynrei la ïoh jubab na u Dy. CEM ma L. Rymbai kam shem la don kano kano jingslem ban issue ïa ki LHC.
Shuh shuh ka kong Khynriam ka la kylli don mo ka jingsiew kum ka TA/DA ïa ki land recorder ka Council kiba leit thew ïa ki jaka, la ïoh jubab haoid ka don ka jingsiew, kumta ka la buh jingkylli balei pat kiba bun na ki briew ki hap ban siew ïa katei ka bai leit thew, na ka liang u Dy. CEM ula kren shai lada don kino kino ba pan ne kiba shim dor, ka Council kan pynshitom shi syndon ïa ki.
Ha kaba ïadei bad ka bhah pisa ba ka Council kam pat ïoh na ka sorkar jylla lyngba ki marpoh khyndew (major bad minor), la jubab na u CEM ka pisa kaba dang sah ka long na ki Major T.17,82,52,740 tyngka bad na ki Minor ka long T.18,22,07,785 tyngka baroh ka long T.36,04,60,525 tyngka.
