Shillong, Naitung 25 : Ka Lady Keane College, Shillong ha ka sngi Thohdieng, ka 25tarik u Naitung ka la rakhe ïa ka jingdap 90 snem ka jingshakri ïa ki khun samla ka jylla ha ka liang ka pule puthi ha ki lain pule bapher bapher.
Ïa kane ka jingrakhe ba tip kum ka Granite Jubilee la wan ban sakhi da u MLA ka thaiñ Bah Sanbor Shullai kum u Kongsan nalor ka jingdonlang ki nonghikai kiba rim kumjuh ki khynnah skul barim kiba la jam shakhmat ha ka jingim jong ki nalor ki nonghikai bad ki spah ngut ki samla pule jong ka College.
Shwa ban sdang ïa kane ka jingrakhe la ïoh ruh ïa ka jingkren maitphang na ka Principal, Dr. AM Shangpliang bud pat sa ka jingpynkup burom ïa ki Principal kumjuh ki nonghikai kiba la shongthait na ka kam bad kiwei kiwei.
Na ka liang u Kongsan haba kren hakane ka sngi u la ai ka jingïaroh ïa ka jingshakri jong ka College kaba la sei bun bha ki samla pule kiba paw bad don bynta ban noh synñiang ïa ka jylla ha la ki jong ki bynta.
U ong ruh ba u sngewkmen ban ïohi ba kawei na ki jaka pule kiba hap ha ka constituency jong u kan kiew ha ka jingshakri ym tang ïa ka thain hynrei ïa ka jylla baroh kawei naduh ka por ba ka Ri ka dang don ha ka jingsynshar ki nongwei.
U Bah Sanbor u la ai ruh ka burom ïa ki nonghikai kiba la shongthait kiba la noh synniang ïa ka college ha ki snem ba la dep bad ruh kumjuh ia ki nonghikai kiba dang bteng ïa ka kam shakri jong ki na ka bynta ka lawei jong ki khun samla.
“Halor ka jingkyrpad jong ka College ban ïa kren na ka bynta ban pynheh shuh shuh ia ka College, nga kwah ban pyntip ba nga la kren bad u Myntri Rangbah ka jylla, Conrad K Sangma bad la kumno kumno ha ka taiew ban wan un sa pyntip na ka bynta ba ngin leit ban kynduh markhmat ïa u bad aiti ruh ïa ka DPR,” la bynrap biang u Bah Sanbor.
Ha kane ka sngi ka la don ruh ka jingpynkup burom ïa ki samla pule kumjuh ki Council bad ki tnad bapher bapher nalor ka jingai jingithuh kyrpang ïa ki samla pule ba pass bha.
Nalor kiwei ki program ba la pynshongkun shongsbai ïa kane ka sngi kum ka dak jong ka jingrakhe la ot ruh ïa u cake ban sah kynmaw ha ki shalyntem jong ka por.
Kiwei pat kiba donlang ha kane ka sngi ki kynthup ruh naduh u President jong ka Governing Body Bah W Khyllep nalor kiwei kiwei ki nongshah khot sngewbha.
