Haba kynnoh ba lum khajna beaiñ ha ka kyrteng KHADC, dei ban ai ki sakhi ba thikna: Powell

Shillong, Naitung 24: Ka Khasi Hills Autonomous District Council (KHADC) ka la khot ïa ka Meghalaya Commercial Truck Owner & Drivers Association (MCTODA) ban ai ïa ki sakhi bad ban kdew ïa ki 16 tylli ki khyrdop ba la kynnoh ba ki dei kiba beaiñ, bad kumjuh ruh ki sakhi satar ba na kine ki khyrdop la lum pisa ha ka kyrteng jong ka KHADC.
Haba kren sha ki lad pathai khubor ha ka sngi Palei, u executive member ka KHADC u Bah Powell Sohkhlet u la ong, “Ka seng kiba ñiah trok ki dei ban pyni ïa ki jingtip ba thikna, kynthup ïa ki 16 tylli ki khyrdop ba la kynnoh bad kumjuh ruh ki sakhi satar ba na kine ki khyrdop la lum pisa ha ka kyrteng jong ka KHADC.”
U Bah Sohkhlet u la pynthikna ba ka KHADC kan sa shim kam lada kine ki jingkynnoh la shem ba ki long kiba shisha, ba kynthup ruh da ka jingphah jingujor sha ki bor badei khmih.
“Hynrei lada ka seng kiba ñiah trok ki shu pynlong tang ïa ki jingkynnoh khlem ki sakhi, kan long kaba eh ïa ngi ban shimkam halor kane ka bynta,” u la ong.
Ka jingkynthoh jong u ka la wan hadien ba ka seng kiba ñiah trok ka la ïakynduh ïa u deputy commissioner ka Ri Bhoi district, da kaba kynnoh ba ka KHADC ka la pynïaid ïa kiba bun ki khyrdop lum khajna bad ka la lum ka khajna na ki trok.
U Bah Sohkhlet u la ong ba kine ki jingkynnoh ki dei ki bym don nongrim namar ka KHADC ka pyntreikam tang 3 tylli ki khyrdop talasi ha Ri Bhoi district, kiba la pyntreikam mynta lah bun tylli ki snem.
Haba phai sha ki mat treikam jong ka Voice of the People Party (VPP) ha ka por election, u Bah Sohkhlet u la banjur ba ka party ka la buh ka thong ban wengnoh ïa baroh ki khyrdop talasi beaiñ bad ym pat ïa ki check gate kiba la pyntreikam katkum ka aiñ kiba don hapoh u pud u sam ka council.
U la ong pat ba ka shong ïa ki bor pynïaid district ban shim kam pyrshah ïa ki khyrdop lum khajna ki bym dei jong ka council.