Shillong, Naitung 24 : Ka HSPDP ka la dei kawei pat ka party kaba la khihwin mynta ban ïa kren na ka bynta ka ishu ïa sam shuki myntri kaba mar arsnem shiteng hapdeng ki arngut ki MLA jongka party.
Halor kane haba ïoh ban ïakren bad u President Rangbah jong ka party, Bah KP Pangniang u la ïathuh ba shen ka party kan sa shong pyrkhat halor kane ka bynta.
“Na ka liang ka party shen ngin sa ïa shong pyrkhat halor kane ka kam na bynta kane ka kam ryngkat baroh arngut ki MLA kumjuh ki nongïalam ka party, ngin sa ïa shong bad pyrkhat lang kaei kaba ngi dei ban shim ïa ka rai,” u la ong.
Shuh shuh u ong ba kum u President hi u kwah ban ïohi ba kaei ka rai kaba ki shim kan dei beit ka rai jong kiba bun balang kynthup naduh u General Secretary kumjuh ki Executive Member ha katei ka jingïalang ba kin sa ïa lum shen.
Ka HSPDP ka don arngut ki MLA bad kine ki kynthup ïa u Bah Shakliar Warjri MLA ka Mawthadraishan u ba dei ruh mynta u Myntri ka tnad Sports jong ka sorkar jylla. Katba uwei pat dei u Bah Methodius Dkhar MLA jong ka Mawshynrut.
Lah ban kdew hangne ba kane ka mat kaba ïadei na ka bynta ka jingsam mar arsnem shiteng ïa ka shuki myntri hapdeng ki MLA ka la shongshit ym tang ha ka party HSPDP hynrei wat ha ka party BJP, NPP bad kiwei kiwei.
