SHILLONG, Naitung 23: Ka Nongumlong SC ka la ïoh ban khur pura ïa ki lai point hynne ka sngi Balang hadien ba ka la jop da 2-0 kol ïa ka Pomlakrai SC ha ka lympung Third Division Football league 2025 ba la pynïaid da ka Shillong Sports Association, ha madan First Ground-SSA Stadium, Polo.
Shuwa kane ka jingïalehkai kaba nyngkong hapdeng ka Lawmali Pyllun SC bad ka Madanryting FC ka la kut ha ka jingïakhaid da mar 1-1 kol.
Ka kol jong u Lanambhah Manner (90’min) ha ka khyllipmat shuwa ban kut ka la pyllait ïa ka Lawmali Pyllun na ka nam rem hadien ba u Banlailang Thabah (55’min) u la pynkhih ïa ka kol kaba nyngkong na ka bynta ka Madanryting SC.
Ha ka jingïalehkai kaba bud la sakhi ïa ka Nongumlong kaba la pynkhihjar ha baroh ar tylli ki kylla ban jop ïa ka jingïakhun pyrshah ïa ka Pomlakrai. U Wallam Lyngdoh u la buh hakhmat ïa ka kynhun ha ka minit kaba 20 shuwa ba u Marques Myrthong un pynskhem ïa ka jingjop da kaba thep ïa ka kol kaba ar ha ka 67 minit.
Ka prokram ïalehkai jong ka lympung 3rd Division Football league 2025 ha kane ka sngi Palei (24.07.2025) kan long hapdeng ka Gorkha pyrshah ïa ka Kharang SC ha ka por 10 shiteng mynstep, nangta bud sa ka jingïalehkai hapdeng ka Rynjah SC pyrshah ïa ka Umlyngka SC ha ka por 1 baje shiteng mynsngi.
