Nongpoh, Naitung, 22: Ka Hynniewtrep National Youth Movement, Mawhati Zone mynta ka sngi ka la dawa syndon na ka sorkar ban pynbiang Doctor bad ki nongtrei ha Mawhati PHC, ban buh da u Branch Manager khasi ha Meghalaya Rural Bank, Mawhati Branch bad kumjuh ruh ban pynbiang thikna ïa ka bording elektrik ha katei ka thaiñ namar kumba long mynta ki paidbah ki mad jingeh kaba khraw ha kaba ïadei bad kitei ki jingeh.
Na ka liang u Bah Tin Mukhim President haka jingdonlang u Samla Donald Muktieh President HNYM Ri-Bhoi District lem bad kiwei kiwei ki dkhot u la ong ba kum ka seng ka dap da ka jingsngewkhia halor ka jingduna nongtrei ha MAwhati PHC naduh ki doctor kaba la buh jingeh ïa ki paidbah kiba leit ban phah sumar ha katei ka jaka sumar jong ka sorkar, namar katei ka jaka sumar ka ai ka jingshakri ïa kiba bun ki shnong.
U la ong ruh ba ka jinglip khah khah bad ka jingbym thikna jong ka bording ilektrik ha katei ka thaiñ ka la buh jingeh shisha ïa ki paidbah ban pyndep ïa ki kam ki jam namar ha kiba bun ki bynta ki briew ki la trei kam lut da ka bording bad lada ka bording kam long kaba thikna man ka sngi ka long shisha ka jingeh ïa ki paidbah, kiba hap ban shu siew beit ïa ka bai bording man u bnai.
Ha kawei pat ka bynta na ka liang ka seng ka la dawa ruh na ki bor ba dei peit ban wanrah noh da u Branch Manager Khasi ha Meghalaya Rural Bank, Mawhati Branch na ka bynta ban pynsuk ïa ki paidbah haka ktien ka thylliej namar bun ki paidbah kim sngewthuh phareng ne hindi bad ka shem jingeh ïa ki ban ïakren ïa ki kam ki jam namar kumba long mynta u Branch Manager jong katei ka bank u dei u bym nang ban kren khasi kaba long shisha ka jingeh ïa ki paidbah.
Namarkata na ka liang ka seng ka la buh ka jingkyrpad sha ka sorkar bad ki bor ba dei peit ban sngew ban sngap ïa ka jingeh jong ki paidbah ka thaiñ Mawhati bad ban pynurlong ïa kitei ki jingdawa.
