Ym dei ban shu kynnoh, sei lang na ka skim MLA ban maramot ïa ki skul ba la jot

Shillong, Naitung 21 : U Myntri ba peit ïa ka tnad Pule Puthi u Rakkam A Sangma ha ka sngi u la ong ki MLA kynthup ïa u Nongïalam ka Liang Pyrshah ha ka Iing Dorbar Thawain ka jylla ba ki lah ban pyndonkam na ka skim MLA (SRWP) na ka bynta ban maramot ïa ki iing skul kiba la jot rathai ha ka jaka ban kynthoh ne wat daw ïa ka sorkar.
U Myntri u la ai nuksa ruh da kaba ong ba wat ma u dalade hi u la dep ban phah maramot hi haduh 45 tylli ki skul Adhoc kumjuh ki skul SSA ha ka constituency la jong da kaba pyndonkam na ka skim MLA, kata da kaba mang 2lak tyngka kawei ka skul.
“Lada baroh ki MLA ki shim ïa ka sienjam ban phah shna ne maramot la kumno kumno 50 tylli ki iing skul man u snem kan long ka jingïarap kaba khraw na ka bynta ban kyntiew ia ki jaka puleha ka jylla,” u la ong haba kren bad ki lad pathai khubor.
Ha kawei pat ka liang u Myntri u la ïathuh ruh ïa ki jingeh kiba bun ba ka jylla ka kynduh da kaba ong ba jan 50 persen na ki 14,000 tylli ki iing skul kidei kiba donkam ban maramot.
U ong ruh ba dei ha kine ki khyndiat snem ba la dep hapoh ka jingïalam jong u Myntri Rangbah Conrad K Sangma ba la shim ia ka rai ba baroh ki iing skul Lower Primary jong ka sorkar dei ban maramot noh bad kin ïoh ruh ïa ka iing skul thymmai. “Don ki jaka ba la dep shna bad don pat kiba dang shna,” u la ong.
Shuh shuh u ong ruh ba kam long satia ka kam kaba suk namar ki don haduh 14,000 tylli ki ing skul ha kaba na kine tang kumba 3,000 – 4,000 tylli ki dei kiba la dep maramot katba kiba dang sah ban pynbha ki don sa kumba 60 – 70 persen.
Kumta, u ong ban shu kynnoh beit ïa ka sorkar ka long kaba bym lah ban long namar kiei kiba kane ka sorkar ka la leh ha ki phra snem ki la paw shynna bha.
Ha kawei pat ka liang u Myntri u kyntu ruh ïa baroh ki MLA bad MP ba ki dei ban buh hakhmat ïa ki jingai jingmut ha ka jaka ba kin pynmih ïa ki jingkynthoh bym ler kam na ka bynta ka lawei jong ki khynnah skul.