Mar ïa buh QR Code ha ka kyiad, khmih lynti ban kiew ka jinglum khajna ha ka tnad Excise

Shillong, Naitung 20 : Ka sorkar ka buh thong ba kan lah ban lum tam shuh sa kumba 5-10 persen ka khajna da kaba pyndonkam noh da ki QR Code ha ki jingdih kiba mih lyngba ka tnad Excise khamtam eh ka kyiad.
Na ka liang ka sorkar jylla ka buh thong ruh ba ka jingpyndait da ki QR Code kan sdang treikam noh naduh u Nailar mynta u snem.
Haba pyntikna ïa kane, u Myntri ka tnad Excise ka Sorkar Jylla Bah Kyrmen Shylla u la kubur ba ka tnad mynta ka la pynkhreh shaid shaid bad ba ki ophisar ruh ki la don ha ka kam ban ïoh pyntrei noh kham kloi ïa une u QR Code.
Kane ka sienjam ban buh noh danu QR code ha ki jingdih buaid kadei kaba ka kynhun Myntri naduh u Lber 2024 ka la dep ai kanjingmynjur ban sdang pyntreikam noh da ka thong ban ïoh lum kham bun shuh shuh ka khajna.
Lyngba unenu code ki paidbah ki lah ban tip haei bad mynno la shna ka ka bad ka dang biang neem ban pyndonkam bad khamtam eh ban tip katno ka dor.
“Ka kam mynta ka la ïaid shakhmat bad ngi khmih lynti ba hapoh ka 15tarik Nailar ngin lah ban pyntreikam noh,” la ong u Myntri.
Kine ki QR code kin pynsuk ruh ïa ka tnad ban buddien ïa ki jait jingdih bapher bapher kiba die lyngba ka tnad Excise. Ym tang katta kan ïarap ruh ban buddien ïa uwei pat uwei u bilor jingdih u ba die ha Meghalaya.
La ong kane kan pynsuk ruh ïa ka sorkar ban buddien ïa ka lynti ïaid jong ki bilor jingdih bad ruh ban tip shaei la pynpoi bad na kaei ka dukan kaba die khamtam eh lada don kano kano ka jinglait ei ka khajna.