Ngi long kiba donbok shibun ba ka Shillong ka dei ka pdeng ka pule puthi ka Eastern India: Paul Lyngdoh

Shillong, Naitung 20: “Ka jinglong kynsai ne Excellence ka dei ban long ka jingmlien bad ka lynti ha ka jingim,” ong u Myntri ka tnat Social Welfare bad u MLA ka 18th West Shillong Constituency u Bah Paul Lyngdoh haba kren ha ka prokram pynkup burom ïa ki 116 ngut ki samla kiba la pass bha ha ki eksam bapher bapher, nangta kiba wanrah nam lyngba ki kam ïalehkai, ki riew donsap ha ka put ka tem ka rwai ka siaw, bad uwei pat u rangbah briew uba la treikam borbah ha ka por ba wan lynshop ka khlam Covid 19 ha ka jylla bad ka ri India baroh kawei.
Ha ka prokram ba la pynlong ha Dinam Hall Jaïaw Pdeng, Shillong u Myntri u la ong, “Ngi long kiba donbok bha ba ka Shillong ka la long ka pdeng ka pule puthi ha kane ka thaiñ Eastern India. Haba nga leit sha Dhaka ki riewshemphang kane ka ri hangthie ki la ong ba ka Shillong ka dei ka Education Hub kumta kane ka pynphalang ïa ngi ba ngi dei ban wanrah biang ïa kane ka nam jong ka Shillong kum ka pdeng ka pule puthi ka thaiñ shatei lammihngi bad haba ai ka jingithuh ïa kiba kynsai ngi dei ban sdang shwa na la ïing kaba ïalam da ki nuksa.”
U la bynrap ruh da kaba ong, “Ban ithuh ïa kiba kynsai donkam ban don ka kynhun ki nongïalam ban plie lad ïa ki sap ki phong bapher bapher, nangta ban ïeng ha la ki jong ki kjat ym tang ban shu shaniah beit tang ha ki kam sorkar kiba mynta ki la poi sha ka kyrdan jong ka jingkyrduh kumta ngi hap ban peit ïa ki avenues ne ki lad ai kam ha ki bynta bapher bapher nalor ki kam sorkar.”
U Myntri ka sorkar u la ïathuh ba dei halor kine baroh ki jingeh ba ki samla ki ïakynduh ba ka sorkar jylla mynta ka la sdang bun ki lad ki lynti kum ka CM Elevate, ka MGMP, nangta ki lad ban thaw ïa ki jingdon jingem ki jaka ba khring ki nongwan jngohkai pyrthei.
“Kine baroh ki jingsdang ka sorkar jylla ki dei ban thaw ki lad ki lynti ïa ka ïoh ka kot ban ïarap ïa ki samla ba kin don ka jingmut ban leh da ki kam da kaba peit ruh sha lyndet jong ki kam sorkar,” ong u Bah Paul da kaba bynrap, “Ngi kwah ban kyntu ïa ki samla ban wengnoh ïa ka rukom sngew tang ma nga hynrei ban kyntiew ïa ki sap ki phong lyngba ki rukom shna ne treikam bapher bapher.”
U la bynrap ruh da kaba ong, “Ngi long kiba donbok ban don ha ka jaka ba long pdeng jong ka Nongbah Shillong bad ngi la ïoh ruh shibun ki jingkyrkhu la ki dei ha ka lad jong ka pule puthi, nangta ki lad pynïasoh ïa ki surok, ngi la ïoh ki lad ban pyndonkam bha ïa ka technology ha kaba bun na kine, ki khynnah skul ha nongkyndong bad kiba shah kyndong kynshrot kim ïoh satia, kumta ngi donkam ban pynheh ïa kane ka bor kiba la don ha ka 18th West Shillong Constituency.”
U la ïathuh ruh ba ka sorkar dang shen ka la ïakren ïasyllok shaphang ka Meghalaya Education Grant Project bad la shem ba bun tylli ki shnong ba ki skul ki don hynrei ka ratio hapdeng ki khynnah bad ki nonghikai ka long kaba duna bha, ki don ki skul ki bym don ruh wat ki jingtei kiba bha.