Ka thaiñ khappud ka la kiew, ong u Bah HM Shangpliang ba pas bha ki khynnah ha SSLC, HSSLC

Shillong, Naitung 20 : Ban ai mynsiem shuh shuh ïa ki samla pule ka thain kiba pass bha shakhmat ha ki eksam, ka Seng Samla Dangar ha ka sngi Saitjain ka la pynlong ïa ka jingpynkup burom ïa ki phra ngut ki samla pule kiba pass bha ha ki eksam Secondary School Leaving Certificate (SSLC) bad kumjuh ruh ha ka Higher Secondary School Leaving Certificate (HSSLC).
Ha kane ka jingpynkup burom kaba long ha Community Facility Centre, Dangar la donlang ruh u MLA barim ka thain ba dei ruh u Nongai buit jong ka tnad Pule Puthi ka sorkar jylla Bah HM Shangpliang kum u Kongsan nalor ka jingdonlang u Rangbah Shnong Bah HS Syiemlieh, ki nongïalam shnong bad ruh ki riew Rangbah nalor ki nonghikai ki Kmie ki kpa bad ki khynnah skul.
u Kongsan ha ka jingkren u la ong ba ka jingpass bha ki samla pule ka pyni ba ka thain khappud ka la kiew stet bha. U ai ka burom ruh ïa ka Seng Samla kaba la shim ïa ka bynta ban ai ka jingithuh bad ka jingpynshlur ïa ki khun samla lyngba kane ka prokram.
“Ha thain khappud jongngi ki don shibun ki kmie ki kpa kim nang kim stad ïa lade hynrei ki sngewthuh ïa ka jingkordor ka pule puthi, kumta ki trei shitom tang ban ïoh pynnang pynstad ïa ki khun ki kti” u la ong.
Shuh shuh u la ïathuh ba ka sorkar jylla hapoh ka jingïalam jong ka National People’s Party, ka la wanrah bun ki jingkylla ha ka tnad. U ong ruh ba dei na kane ka sienjam ba bun ki samla ki la pass bha bad long ruh ka jingkmen ïa ki kmie ki kpa kiba la trei shitom.
Shuh shuh u la ong ruh ba ki kmie ki kpa ki donkam ban ïa don bynta ha la ki iing ki sem ban peit ïa ki khun ki kti ba kin trei shitom bad kumjuh ruh ki nonghikai skul kiba long kum ki kmie ki kpa ba-ar.
Ha kajuh ka por u Kongsan u la ai khublei ruh ïa ki nonghikai kiba don ka bynta kaba kongsan na ka bynta ka jingpass bha ki samla ka thain.
Na ka liang u Rangbah Shnong Bah HS Syiemlieh u la pynpaw ba u dap da ka jingkmen ïa kane ka sienjam ba la shim da ka seng samla ban pynlong ïa kum kane ka program ha ka sien ba nyngkong eh bad kane ka jingleh ka seng samla kala leh ïa kaba bha ban ai mynsiem ïa ki samla pule jong ka shnong.
U la ong ki khun samla jong ka shnong Dangar kiba la leh bha ha ka eksamin SSLC bad HSSLC kidei hok ban ïoh ïa kane ka khusnam. “Ha kane ka juk ba mynta kiba bun ki briew kim ju kylli shuh phi pass ne em hynrei ki kylli katno percentage phi ïoh, kumta donkam ïa ki kmie ki kpa ban ïa trei lang bad ki khun ba kin lah ban leh khambha shuh shuh.”
U Rangbah Shnong u la pynpaw ruh ba kiba bun ki kmie ki kpa kidei kiba duk hynrei ki angnud bad thrang bha ban pynnang pynstad ïa la ki jong ki khun ki kti da kaba ki leit bylla thohdieng tang ban ïoh phah skul ïa ki khun.
Ha kane ka sngi la ïoh ruh ka jingkren na u Bah T Kharraswai uba dei u nonghikai ha kaba u la ai ka jingsneng jingkraw ïa ki khynnah skul bad kren ruh halor ki dak thoh Khasi bad pynpaw ruh ka jingkyrmen ba ka ktien Khasi kan ïoh rung noh ha ka Khyrnit ba Phra jong ka Riti Synshar ka ri India.