Ka jylla ka donkam ïa ka jingïarap ka sorkar pdeng ban sei ïa ki nongïalehkai kiba tbit : Banteidor

Shillong, Jylliew 24 : U Myntri ka tnad Sport bad Youth Affairs u Bah Banteidor Lyngdoh ula pynpaw ha ka National Conference jong ki myntri Youth Affairs bad Sport na ki jylla Union Territory kaba long ha Kevadia, Gujarat ha ka 24 bad 25 tarik Jylliew 2022 ba ki jylla kiba rit kiba duna ki kompani ba heh ban bei tyngka kum ka Meghalaya ki donkam ïa ka jingïarap jong ka sorkar pdeng ban kyntiew ïa ki kam ïalehkai sport khnang ban ïoh sei ïa ki nongïalehkai kiba tbit kiban mihkhmat ïa ka ri sha ki lympung jingïalehkai bapher bapher.
Ha kane ka National Conference la don lang u Myntri kam sport and Youth Affairs ka sorkar pdeng u Anurag Thakur. Na ki jylla jong kane ka thaiñ ki myntri kam sport bad youth affairs kiba la poi sha katei ka conference ki long tang na Meghalaya, Assam, Manipur bad Arunachal Pradesh.
Kane ka Conference ba la pynlong da ka tnad sport bad youth affairs jong ka sorkar pdeng ka long ban ïakren halor kiba bun ki mat kumno ban kyntiew ïa ki kam ïalehkai sport ha kane ka ri baroh kawei da kaba la pan jingmut na ki myntri jong ki jylla bad union territory bapher bapher kiba don ha katei ka jingïalang. Kadei shibynta na ka Khelo India bad ha kane ka jingïalang u la banjur ïa ki jylla ba kin ai jingmut sha ka tnad kam sport jong ka sorkar pdeng kumno ban sei ïa ki nongïalehkai kiba tbit.
U Bah Banteidor u la ong “ Na ka liang jong nga kum u myntri ka tnad sport bad youth affairs ka Meghalaya ym tang ba nga pynpaw ba donkam ki jingïarap na ka sorkar pdeng ban kyntiew ïa ki kam ïalehkai sport hynrei nga la pan ruh ïa ki skhim ha ka jingïakynduh pat bad u myntri kam sport u Anurag Thakur hadien ba la wai ka jingïalang ba mynta ka sngi bad u la kular ban ïarap ïa ka jylla Meghalaya ba kan dang lah ban kyntiew ïa ki kam ïalehkai sport ha ka jylla, ka thaiñ bad ha ka ri hi baroh kawei”.
U Anurag pat ula ong, “ Ha kino kino ki jylla, haba ïohi ba ki nongïalehkai sport ki kham ieit bad sngew-tynnad ban ïaleh ïa kano kano ka jingïalehkai ka sorkar ka dei ban pynleit jingmut ban kyntiew ïa kata ka jingïalehkai khnang ban ïoh jied ïa ki nongïalehkai kiba tbit”.
“Nalor kata donkam ruh ban ïoh wat ïa ki Coach ruh kiba tbit bad halor kane ruh ki jylla bad ki UT ki don ka bynta kaba khraw ban sei ïa ki coach. Na ka liang ka sorkar pdeng ka kloi ban ai kino kino ki jingïarap ïa ki jylla bad UT na ka bynta ban pynbit pynbiang ïa ki jaka ïalehkai sport khamtam ïa ki madan, ki rynsan, ki tiar ïalehkai bad kumta ter ter”.