Pynphai ki 38 shnong ïa ki EPIC sha ka Assam ban pynshisha ba ki dei ki nong Meghalaya

Shillong, Jylliew 23 : Ki nongshong shnong jong ki 38 tylli ki shnong ha West Khasi Hills ki la pynphai lut ïa ki Electoral Photo Identity Card (EPIC) jongki sha ka sorkar Assam kum ka dak ban pynpaw bad pynshisha ba ki kwah ban don ban sah ha Meghalaya.
ïa kane la pynpaw da ki nongsynshar shnong jong ki 39 tylli ki shnong hadien ba ki la dep ban aiti ïa ka memorandum ba ki ïasoi lang sha u Symbud Myntri Rangbah ka jylla u bah Prestone Tynsong mynta ka sngi Palei khnang ba ka sorkar kan bishar bniah lypa shwa ban sdang ka jingïakren ha ka wat kaba ar.
Kine ki Khlieh Nongsynshar na kitei ki shnong kiba hap sawdong jong ka Langpih ki la poi sha Secretariat ryngkat u MDC na katei ka thaiñ, Bah Bajop Pyngrope ban kyntu ïa ka sorkar jylla ba kadei ban pyntikna ba ka Langpih Sector kan hap beit sha Meghalaya.
Haba kren bad ki lad pathai khubor hadien ka jingkynduh ïa u Symbud Myntri Rangbah ka jylla, Bah Prestone Tynsong, na ka liang u MDC, Bah Bajop Pyngrope u la ong, “Ki la don haduh 39 tylli ki shnong kiba la soi lang ïa ka dorkhas na ka bynta ban dawa ba kitei ki jaka kin hap beit sha Meghalaya.”
Katkum ka jingong jong u, tad haduh mynta kumba 95 persen ki la thikna ba ki kwah ban don beit ha Meghalaya hynrei haba ïadei pat bad kiwei ki 5 persen kiba tam, u la ong ba ki Hima hi kin shim ïa ka jingkitkhlieh ban ïakren bad pynkohnguh ïa ki ban donlang ha ka jylla.
U Bah Bajop u la ong ruh ba katei ka jingwan jong ki ban kynduh ïa bor sorkar ka long kum ka jingpyntip bad ka jingpynkhreh lypa ha shwa ba ka jingpynbeit pud ha ka sien kaba ar bad ka Assam kan sdang. U la ong ruh ba kane ka sienjam ba ki shim mynta ka long ruh ban pynpaw lypa ïa kaei kaba ki paidbah ka thaiñ ki la don lypa ban ong ynda ki Regional Committee ki la wan ha ki shnong ki thaw jong ki.
Shwa kane, u Bah Bajop u la ong ba ki la ïohi ïa kaei kaba jia ha ka jingpynbeit pud ha ka wat kaba nyngkong ba ki nongshong shnong dang sdang ki kwah ban hap sha Assam hynrei haba ki ïohi ba bun ki kwah ban don sha Meghalaya ma ki ruh ki kwah lang tangba ka por pat ka la dier.
Hooid wat la ki ar Myntri Rangbah kim pat ïa rai lano kin sdang ïa ka jingïakren pynbeit pud ha ka wat kaba ar ban pynbeit sa ki hynriew tylli ki jaka ba don hapdeng ka jingïakajia u bah Bajop u la ong “ Shwa ba ngin leit shaka thma ngi hap ban long kiba la pynkhreh lypa namar ngim kwah ban shim rai kyrkieh bad dei na kata ka daw ngi sa wan mynta ka sngi ban ïakynduh bad ïakren bad u Symbud Myntri Rangbah. Ngi kwah ban long kiba la khreh lypa khnang ba ynda wan ki Regional Committee jong ka Assam bad Meghalaya ngin ïoh ban pynpaw hakhmat jongki”
U la ong baroh shi katta kine ki shnong ki ïoh jingmyntoi na ka Assam bad Meghalaya ruh. Ki EPIC ruh ki don ha baroh ar jylla bad mynta ki la pynphai lut ïa kiba dei sha Assam namar ki kwah ban pynpaw ba ki kwah ban neh bad ka Meghalaya.
U la ong “ Balei ba kine ki shnong hadien ka jingïakren ha ka wat ba nyngkong ki kyndit bynriew, ka daw ka long ba ki la ïohi ba ki don ki kynhun pynkulmar kiba ïeng ban ong ba ki kwah ban don sha Assam bad don kiba ong ba ki kwah ha Meghalaya. Kane ka la pynkulmar jingmut wat ïa ki ar sorkar ruh, kumta ha kane ka wat kaba ar kine ki briew da kawei ka sur kin pynpaw beit hakhmat ki Regional Committee ba ki kwah ban don ha Meghalaya. Nga kyrpad ruh ïa baroh ki nongshong shnong ba kin ïeng tylli lang mlon bad pynpaw da kawei beit ka sur ba ki kwah ban don ha Meghalaya”.