Nongstoiñ, Naitung, 15: Ka jingïaseng Women’s Week lane ka taïew ba kyrpang ki longkmie jong ki jingïaseng kynthei balang Presbyterian, ba la pynbeit da ka Jingïaseng kynthei jong ki saw tylli ki Synod kiiba hap hapoh jong ka Khasi jaiñtia Presbyterian Assembly, kata ka KJP Synod Mihngi, Sepngi, Ribhoi bad Synod pdeng ka la sdang naduh ka janmiet sngi nyngkong.
Ka phang pdeng lane ka theme ba ka Jingïaseng kynthei jong ka KJP Assembly ka la buh ha une u snem ka long, “Ka jingthew ka jingdap rynïeng u Khrist” kaba la seng nongrim na ka shithi u Appostol Paul sha ki nong Ephesos ka lynnong ba 4 bad ka dkhot kaba 3 kaba ong, “Da kaba ïaleh minot ban bat ïa ka jinglong kawei jong u mynsiem ha ka jintgkhum ka jingsuk”, ïa kaba la phiah ha ki ar tylli ki bynta kaba nyngkong (A) Ka jingngeit Khristan kaba dap rynïeng ha u Khrist bad (B) “Ka balang kaba san haduh ka jingdap rynïeng u Khrist”.
Ka jingsdang jong kane ka taïew ba kyrpang jong ki jingïaseng kynthei kiba ka KJP Assembly ka la ailad naduh ki snem ba mynshuwa, ka dei kawei na ki lad ban pynkhlaiñ ïa ki jingïaseng kynhei ha baroh ki balang na ka bynta ban wanrah ïa ka jingïatylli ha ki kam jong ka jingshakri Blei bad ym tang ha ka jingshakri Blei, hynrei ban wanrah ïa ka jingïalong kawei ha ki longïing longsem ha ki shnong ki thaw bad ka imlang sahlang.
Ym lah ban len ruh ba baroh ki Balang Khristan kiba don ha kylleng satlak ka pyrthei, ki dei ki kynhun kiba hakhmat eh kiba ai ïa ki jinghikai kiba janai sha ki paitbah la ki dei kiba la long Khristsan ne ki bympat long Khristan ruh.
Haba phai pat sha ka phang pdeng lane ka Theme ryngkat ki artylli ki Sub theme lane ki phang symbud ba ka Jingïaseng kynthei jong ka KJP Assembly ka la buh ha une u snem, ki long shisha ki mat kiba biang por bha la ka long ha ka jinglong jingim ha ki longïing longsem ka imlang sahlang lah bad ka rukom shakri Blei haman la ki balang.
Naduh ka janmiet jong ka lah sngi u Blei ki baje haman la ki shnong, ki la sawa namar ba ka dei ka janmiet kaba nyngkong ha kaba ki Jingïaseng kynthei ki sdang bad plie artad ïa ka Theme lane ka phang pdeng na ka bynta ka jingshakri blei ha kine ki hynriew tylli ki janmiet haduh ba ka sngi u Blei kaba la ju tip kum ka Women Sunday.
Haba phai pat ha ka jinglong jingman jong ki briew ha kine ki sngi ym lah ban len ba ka jingïalong shi tylli, ka jingshongsuk shong saiñ ka jingïlong kawei ha ki longïing longsem ki la hiar arsut, ki kam sniew ki la nangkharoi bad ki la biang phong rai wat haduh ki ïing ki sem jong ki Nongsharai balang kaba la pynlong ïa ki balang Khristan ba kins ha kdew kti na ka por sha ka por.
Nalor kata ka jingnang kharoi jong ki jinghikai ba bakla shaphang ka jingngeit ba kynja Blei ka la nang jur. Kumta lyngba kane ka Women week jong une u snem, ka long kaba donkam bha ba ki longkmie jong ki Jingïaseng kynthei kin pynleit jingmut bha bad shimkhia ban pynsngewthuh lyngba ki jingïaseng ba ki pynlong haman la ka janmiet, khnang ba ki jingthmu jong ki Jingïaseng kynthei jong baroh ki balang hapoh ka KJP Assembly kin long kiba seisoh.
