Ïateh lok ka NEHU bad ka Embassy France ban kyntiew ki lad wad kam ha ki ri ka pyrthei

Shillong, Naitung 13: Ka North-Eastern Hill University (NEHU), Shillong, ka la pynïaid shakhmat ïa ki kam jong ka ban thaw ïa ka jingïadei bad ïateh paralok bad ki ri ka pyrthei ba kynthup ïa ka Embassy ka ri France bad ban kyntiew ïa ki lad wad kam ha ki ri ka pyrthei na ka bynta ki samla pule ha kylleng ki jylla kane ka thaiñ shatei lammihngi.
Ha ka jingleit jngoh jong u ïa ka Embassy ka ri France ha New Delhi, u Prof Prabha Shankar Shukla, Vice-Chancellor ka NEHU, u la ïashim bynta ha kiba bun ki jingïasyllok bad ka Stéphanie Orfila, Attaché for Cooperation in Education, Embassy of France, bad ka nongmihkhmat jong ka French Institute ha India.
Kane ka jingïasyllok kaba la ngam jylliew bha ka phang pdeng ka dei ban pynkhlaiñ ïa ka jingïatreilang ha ka pule puthi hapdeng ka NEHU bad ki skulbah ba paw khmat ka ri France ba kynthup ruh ki jaka pule jong ka.
Ka thong ba hakhmat eh ba la wanrah kadei ban kyntiew ïa ki kam hikai ïa ka ktien France, nangta ka jingpynwandur ïa ki syrnot ba la shna lang bad ki diploma program, ka ban pynsuk ïa ki nonghikai bad ki samla pule ban ïasam ïa ki jingnang jingtip, bad ka ban thaw ïa ki lad ka jingïatreilang ha ki kam wadbniah ha ki jaka kiba don ka jingïasngewthuh jingmut lang.
Baroh arliang ki la pynpaw ka jingdonkam ki jaka ban pynïasoh ïa ka ktien France ha ki jingai jinghikai da ki sap jong ki riew shemphang.
Halor kane ka nongrim, u Prof Shukla u la sam ruh ïa ki rukom pyrkhat kam ka NEHU ban pynïar ïa ki jingdonkam ki jingkyrshan na ki ri ka pyrthei da ka jingïatreilang bad ka Dr. Skill, kaba la ai ka lad ban pynïohkam ïa palat 150 ngut ki kyrtong ha kylleng ki ri Europe bad kiwei pat ki thaiñ.
Haba phai sha kane ka jingïatreilang, u Prof. Shukla u la kynthoh: “Ki jingïasyllok jong ngi bad ka Orfila ki la long shisha kiba mih ki soh ba bha bad kiba ai mynsiem. Ka NEHU ka buh ka thong ban pynkupbor ïa ki samla pule da ka jinghikai kaba kynsai tam kiba ïahab bad ki jingpule ba la don ha ki ri ka pyrthei, kaba kynthup ïa ka jingdonkam ban tip ïa kiba bun ki ktien, bad ka jingshaniah ban jop ha ki kam baroh. Da kaba kynthup lang ïa ka jingpule ïa ka ktien France, ka jingpynïasoh lang ha ki prokram kolshor, bad ki jingkyrshan ban ai kam, ngi thmu ban thaw ki jingkylla thymmai kiba shisha ha ki lynti jong ka pule puthi.”
Kane ka jingtyrwa kan kynthup ïa ka jingbuh ïa ka French Language Centre ha NEHU, ka ban shakri kum ka pdeng ban kyntiew ïa ka pule puthi ha ki ktien bapher bapher bad ka jingsam ïa ki kolshor.
Kane ka Centre kan tyrwa ka jingai jinghikai kaba bniah halor ki ktien bad ki prokram ai syrnot kiba ïasoh lang bad ka kyrdan pule ki ri ka pyrthei ban pynthikna ba ki samla pule kin ïoh ki jingithuh ïa ki jingtbit jong ki ha ki ri ka pyrthei. Haba ïadei bad ki jinghikai ha ki kamra klas, ki don bun jait ki kam halor ki kolshor, kum ki French film festival, literary workshop, bad academic seminar, ki ban sa pynlong ban pynngam jylliew ïa ka jingsngewthuh ki samla pule ïa ka kolshor ki nong France bad ka imlang sahlang jong ka.
Kane ka jingïatreilang kan ai ruh ka jingkyrshan na ka bynta ki scholarship, internship, bad ki prokram ba ïasam ha ri France, ka ban pynlah ïa ki samla pule ban myntoi ïa ki jingkordor ka pule puthi ha kiwei pat ki ri. Shuh shuh la ong ba ka NEHU kan ïatreilang ryngkat bad ka Dr. Skill ban ai ka jingshakri haba ïadei bad ki jingpule ki ban plie lad ha ka ïohkam ïohjam bad kan ïarap ruh ïa ki ban lah kren ha kito ki ri kiba pyndonkam da ka ktien France.
Katba ka Stéphanie Orfila, Attaché for Cooperation in Education ha Embassy ka ri France, ka la kynthoh: “Ka Embassy ka ri France ka aiti pura ban kyrshan ïa kane ka jingïatreilang kumba la kular bad ka NEHU bad ka Dr. Skill. Da kaba pynïasoh lang ha ka academic excellence, ki kyntien kiba shem thymmai, nangta ka thong ban kyntiew ïa ka pule puthi bad ka thong ban kyntiew ïa ki sap ki phong, ngin sa lah ban pynkupbor ïa ki samla pule ba kin lah ban jop ïa ki jingangnud jong ki ha ka jingwad ïa ki kam ki jam hapoh ka ïew ka ri France bad shalyndet jong ka. Ngi peit shakhmat ban plie ïa ka jingïatreilang ha ka kam pule puthi ka ban plie ka jingkyrmen na ka bynta kiba dang pule na kane ka thaiñ shatei lammihngi ka ri India bad ka jingpynkhlaiñ ki jingïateh hapdeng ki ri jong ngi.”