Shi hajar tylli ki kali yn lah ban pynïeng ha ki Parking Lot thymmai, yn sa duna ka dheng kali : Dy.CM

Shillong, Naitung 13 : U Symbud Myntri Rangbah ba dei peit ïa ka tnad Transport, Bah Sniawbhalang Dhar u la ïathuh ba ki parking lot ba dang shna thymmai kin ngiam ban pynïeng kumba 1,000 tylli ki kali man ka sngi.
Haba kren bad ki lad pathai khubor, u Symbud Myntri Rangbah u ïathuh ba ynda la dep lut kine ki parking lot, ka jingdheng kali kan sa duna hi nalor ba ka sorkar ka ïakhun ruh mynta ban ym ailad shuh ïa ka jingïeng kali pathar ha ki rud surok.
U Symbud Myntri Rangbah u ïathuh ruh ba kine ki jaka pynïeng kali lane ki parking lot ki don ha kylleng ki bynta jong ka nongbah kynthup lang ïa kiba don hajan Additional Secretariat bad hajan Motphran.
“Ngi trei borbah mynta ban tehlakam ïa ka jingdheng kali khnang ba ki kali ba leit ba wan kin lah ban ïaid khlem da mad jingeh shuh ha ka nongbah,” u la ong haba kren bad ki lad pathai khubor.
U Bah Sniawbhalang u la ong ruh ba ki pulit ki la pyntyllun ïa kam shakhmat ban peit halor ka rukom pynïeng kali bad kino kino kiba leh tam kin ngat ha ka kuna.
Nangta u la ïathuh ba katkum ka Parking Policy yn sa pynbna shen ha kaba ki kali kin ym lah shuh ban shu pynïeng kat shaba lap kumba long baroh shi katta ha ki surok. “Kin don pat ki jaka kiba ngin sa jied bad sa shim pat ka dor kumba la pynbeit,” ula ïathuh shuh shuh.
U Symbud Myntri Rangbah u la ïathuh ruh ba dang shen u la shong ïa ka jingïalang bad ki ophisar bad la pyntip ïa u ba kiba bun ki parking ki la jan dep lut bad la khmih lynti ruh ba sa tang katto katne bnai yn lah ban pyndonkam noh ïa ki.
Nangta u la ong ruh ba ka sorkar shen kan sa pyntreikam noh ïa ki katto katto katne ki parking lot kiban ngiam kumba 300 haduh 400 ki kali katba ïa ki parking lot kiba dang sah pat yn sa aiti kham hadien ban pyndonkam.
“Kumba long mynta ngam pat tip kiei kiei ki parking lot kiba la dep bad kiba la long ban pyndonkam noh. Hynrei la kumno kumno ha ki khyndiat por ban wan ngi tikna ba ngin ïoh ban pyndonkam shwa katto katne tylli na ka bynta ban pynïeng ïa ki 300 haduh 400 tylli ki kali,” u la ong.
Shuh shuh u ong ruh ba ynda la dep sa ka MTC Building ruh hangtei yn lah ban pynïeng bun bha ki kali nalor ha kiwei kiwei ki jaka.