Shillong, Jylliew 23 : U Ferdinus Marbaniang ula shah rai pynrem ha ka ïing bishar POCSO Act da kaba u hap ban shong hapoh phatok haduh 5 snem lai bnai ryngkat ka kuna kaba 3 hajar tyngka namar une u la don kti ban leh beijot ïa kawei ka khynnah ba dang 14 snem ka rta.
Ki pulit jong ka Rynjah Police Station ki la ïoh pdiang ïa ka jingujor ejahar ha ka 24.5.2015 ba kawei ka khynnah kaba dang 14 snem ka rta ka la shah leh beijot ha une u Ferdinus Marbaniang. Mar mar la rejister case kat kum ka Rynjah PS Case No 86(05)U/S 10 POCSO Act bad la aiti ha ka WPSI/ K.D Sangma ban tohkit. Hadien ba la dep tohkit la charge sheet ïa une u briew ha ka 8.3.2016. Ha ka 21.6.2022 ka ïing bishar ba kyrpang ba la thung ban bishar ïa kiba shah pynngat ha ka POCSO Act ka la lap ba u Ferdinus u donkti ban leh beijot ïa katei ka khynnah bad kumta la rai pynrem noh ïa u.
