Ka jingpyntreikam ka GHADC ïa ka ‘Assam Schedule’ ka la pyntlot bor ïa ki Nokma, ïathuh u MDC Tura

Shillong, Naitung 08: U MDC ka BJP na Tura u Bernard N Marak ha ka sngi baar u la aiti ïa ka dorkhas sha u Lat ka jylla u CH Vijayashankar, ha kaba u la kyrpad ïa ka jingtuklar jong u ban khmih ïa ki jingpynkheiñ ïa ka riti synshar ka ri bad ban wanrah biang ïa ka jinglong kyntang ka Sixth Schedule hapoh Garo Hills Autonomous District Council (GHADC).
U Marak u la kynnoh ba ka jingshim ne pyntreikam kaba khlem da ai bor ïa ka “Assam Schedule” da ka GHADC ka la pyntlot ïa ka khyndew ka shyiap ba la buh da ki mynbarim bad ka jinglum khajna da ki bor pynïaid ha Garo Hills, ka la nang pyntlot ïa ka bor jong ki Nokma.
U la kam ruh ruh ba ki seat ba la bhah kyrpang ha GHADC la plie lad na ka bynta ki general candidate, ha kaba kane ka la pynkheiñ ïa ka hok saiñ hima sima jong ki jaitbynriew riewlum.
U Marak u la ïathuh ruh ba ki nongshong shnong kiba dei ki Scheduled Tribe ki la hap ban apply na ka bynta ban ïoh ki syrnot bad ki kaiphod ba kongsan lyngba ki ophis ka jylla, kaba ïaid lait ïa ka GHADC, ha kaba ka la pynkheiñ ïa ki kyndon ka Sixth Schedule.
U la kdew ruh haba ïadei bad ki municipal ki bym lah ban treikam hapoh ki Scheduled Area, hynrei la wanrah bad pynrung pat ha Garo Hills lyngba ka jingshim rai ka Council, kaba pynkheiñ ïa ka riti synshar ka ri.
U Marak u la kynnoh ruh ba ki tnat kiba haba sdang ki dei hapoh ka jingkmih ka GHADC ki la shah knieh noh ha ka sorkar jylla, ha kaba kane ka la pynthylli ïa ka bor ka Council.
U la kam ruh ba ki jaka puta ne ki khyndew ki Nokma ki la shah pynbna kum ki jaka jong ka GAD khlem da ïoh katkum ka lynti kaba dei, ha kaba kane ka la pynkheiñ ïa ki hok ki jinglongtrai ka khyndew ka shyiap ki riewlum.
U Marak u la kyntu ïa u Lat ban shim ki kam kiba donkam ban ïada bad ban pynim biang ïa ka Sixth Schedule ha Garo Hills, ban pynbeit ïa ki jingtreikam kiba la pulom bad kiwei pat ki bynta ka riti synshar kiba la wanrah ka jingma ïa ka GHADC.
Ka GHADC ka la hap ban mad bun ki jingïaleh, ba kynthup ka jingduna ka pisa, ka jingbym lah ban siew ki tulop ki nongtrei bad ka jingshah ot khajna lyngba ka GST kaba u Marak u la pynpaw ba kine kidei ki jingdkoh ki jingtreikam ka riti synshar ka ri.