Jowai, Jylliew 23:Ka Jaiñtia Sudent Union (JSU) Jowai Circle mynta ka sngi ka la pynkynmaw sa shisien sha ka sorkar lyngba ka shithi ba la phah sha u myntri ka koit ka khiah u James K. Samgma, kumjuh sha u Aman War, Director(MI) DHS bad sha u Conrad K Sangma, myntri rangbah ka jylla bad dawa na ka sorkar ban pyntreikam noh ïa ka Maternity & Child Hospital kaba don ha Panaliar Jowai.
Kumba ka long mynta la ïathuh ba katei ka MCH kala biang nadong shadong ki building bad kiwei pat ki jingdonkam hynrei ym shim la pyndonkam ïa ka na ka bynta ban ai jingshakri ka ki ki longkmie bad khyllung. Hynrei naduh ba la wan lyngshop ka khlam Covid-19 la pynlong shipor ïa ka kum ka jaka sumar Covid-19.
Ka JSU ha ka jingleit peit ïa ka Civil Hospital ha Ialong kala sakhi ba namar ka jingduna ki jingthiah ha Maternity Ward ba ki longkmie ba pun khun kiba la hap ban thiah ha ki lynti (passage) jong ka hospital.
Kumta ka JSU lyngba u samla Aplang Lamare, President JSU Jowai Circle bad Wansalan Dame Patwet, General Secretary kila dawa jur ban sdang noh ka jingshakri kumba la mang ïa ka MCH ha Jowai ban ai ka jingshakri ba paka ïa ki nongshongshnong ka Ri-lum Jaiñtia, khamtam ba ki nongpang bad kiba pun khun bad ki khyllung ba kin ïoh ïa ka jingsumar kaba paka kum ki OPD, ICU, NICU, OD, Labor Room bad kiwei de ki jingdonkam ha ka MCH.
