Yn lum jingïalang ka Congress ha Umroi ban pynkhlaiñ bad pynthymmai ïa party

Nongpoh, Jylliew 23: Da ka jingthmu ban pynkhlaiñ bad pynkhie rasong biang ïaka party Congress ha Umroi Constituency, hadien ka jingmih noh jong u MLA u Bah George B Lyngdoh u ba la leit pynïasoh ïalade sha ka party AITC, ki nongïalam ka Umroi Block Congress Committee (UBCC) kila shim ïaka rai ban lum biang ïaki nongkyrshan jong ka party Congress naka bynta ban pynthymmai biang ïa ki nongkitkam haka jingïalang ban long haka 25 tarik mynta u bnai ha Umroi.
Haba kren sha ki lad pathai khubor naka liang u Bah Sunlight Shadap President ka UBCC u la pyntip sha katei ka jingïalang jong ki nongïalam Congress baroh kan sdang naduh ka por 11 baje mynstep bad ka jingthmu jong katei ka jingïalang ka long ban jied thymmai ïaki nongkitkam jong ka Youth Assembly bad ka Mahila ha Umroi Constituency kiba la don ruh ka jingdkoh ka rukom treikam naduh ka jingmih noh jong u MLA ka thaiñ naka party Congress kiba la shu shah ieh khunswet.
Katei ka jingïalam ka long ruh ka jingpynkhie rasong bad pynim biang ïaka party Congress kaba ki paidbah haduh mynta ki dang don ka jingshaniah bad pynjop ruh kumba 4 sien ha katei ka constituency, ha kaba shen naka liang ka party kan sa pynbna ruh ïa u kyrtong ban ïakhun na katei ka constituency bad ha katei ka sngi yn wan ruh ban sakhi lang da u Bah C Marngar President ka District ban pynshit pynshngaiñ bad ai mynsiem.
Namarkata naka liang ka UBCC ka khot ka wer ïa baroh ki para samla ki longkmie ban ïa mih paidbah ha katei ka sngi, watla ka jingmih noh u MLA ka pynduh mynsiem ïakiba bun hynrei naka liang ka party kan trei shitrhem ban pynjop ïa u kyrtong ha kane ka elekshon ban wan.