Nongpoh, Jylliew 23 : Ban nym ktah ïa ka mariang bad ban nym pynmih jaboh na ki jaka pynlang dewiong (Coal depot), u Deputy Commissioner ka Ri Bhoi mynta ka sngi u la pynmih da ka hukum ba la khang pyrshah ba pynlong ïa ki jaka pynlang dewiong ha kino kino ki jaka khlem da ioh jingbit da ki bor ba dei peit jong ka tnad sorkar.
Ban tehlakam ïa kine ki jaka pynlang dewiong ha Ri Bhoi, u Deputy Commissioner u la pyntreikam katkum ka section 25 and 26 jong ka Water (Prevention bad ka Control Pollution) Act, 1974, ba la khang pyrshah ïa kino kino ki jaka pynlang dewiong kiba tuid sha ki wah bad ruh kiba pynmih ïa ki jaboh ba ka ktah ïa ka jingjaboh jong ka lyer.
La pyntreikam ruh da ka Section 21 ka Air ((Prevention and Control of Pollution) Act, 1981, ba la khang pyrshah ban pynlang ïa ki dewiong ba ka lah ban pynmih ïa ki pum pum ne ki jingjaboh ka lyer ha kaba ki dei ban ioh jingbit shuwa na ka State Pollution Control Board.
Ha kaba ïa dei bad kane ka bynta, baroh kito kiba dei trai ïa ki jaka pynlang dewiong ne ki kynja ing ba ki pynlang ïa ki dewionig ki donkam ban ioh jingbit shuwa na ka Meghalaya State Pollution Control Board hapoh ka 2 taiew bad lada ki ïaleh pyrshah kin shah pynshitom katkkum kitei ki kyndon aiñ.
Shuh shuh, la pyntip ruh ba na ka bynta ki trai ba don jaka pynlang dewiong ki lah ban ioh ka jingtip ba bniah na ka ophis ka Meghalaya State Pollution Control Board kaba don ha Arden Lumpyngngad, Shillong ladne ki lah ban wad jingtip ruh na ka Website megocmms.nic.in.
