Jowai, Jylliew 23: U Dr. H.H. Mohrmen uba dei u kyrtong ban ïakhun ïa ka election 2023 na ka Jowai Constituency mynta ka sngi ula pyntip ba ka jingïasoh jong u bad ka seng All India Trinamool Congress (AITC) namar ba kadei ka seng kaba long ka National Party kaba nangkiew hapoh ka ri bad ka don ïa ki nongrim kiba katkum ka riti synshar jong ka ri.
Ula ïathuh haka jingleit ïakynduh briew sha kiba bun ki jaka, ka jingkylli kaba ki briew ki buh ka long na kano ka seng phin ïeng? Haba peit ïa ka jinglong jingman hapoh ka Jowai Constituency ula pyrkhat bha bad la lap ba ka AITC ka dei kaba ym pat don kyrtong ha Jowai.
Hynrei hashwa ba un rung sha katei ka party ula ïakren shai ha kaba ïadei khamtam bad ki mat ba dei ban ïada ïaka jaidbynriew ba ritpaid bad hadien ma u bad ki nongkyrshan ki la ïoh jingshai na ki nongïalam ka seng ula rai ban rung sha ka seng AITC.
Naka liang jong u shimet ruh ua buh kyndon ba ka seng kam dei ban khang ïa u ba un rah ïa ka ishu bamsap khamtam kiba hapoh ka Jowai konstitwensi. Ha kaba ïadei bad ka ilekshon un ïaid kumba ula kular khlem da pynbiej da ka pisa.
Katba ïa ki rally kiba ka party ka leh kata ka dei ka jingkitkhlieh jong ka parti, hynrei ka kampain jong u kan long ba un pynlut tang khyndiat eh katba lah.
Ha ka juh ka por ula pyntip ba un trei ruh katkum ka vision bad blueprint kaba ula dep pynkhreh bad ka parti kam don hok eiei halor kane.
“Ngi baroh ngi don la ki jong ki jingmut bad nga ngan ym lah ban pynhun lut ïa baroh hynrei tang kawei ba nga shai halade ka long ba nga ngan ym die tad dor ïala ka longrynïeng jong nga bad kaei kaba u leh ka dei katkum ka jingïatiplem bashai jong u namar ha kaba khadduh kaba kongsan ka dei ka jingïadei kaba shai jong nga bad la u nongthaw”, la ong u Dr Mohrmen.
