Shim kabu u kontraktor : Dawa ban phah maramot mardor ïa ka PMGSY na Shngimawleiñ kaba 3.42 km: FKJGP

Mawkyrwat, Jylliew 23: Ka Federation of Khasi Jaiñtia & Garo People (FKJGP) jong ka Mawkyrwat Circle ryngkat ka Shngimawlein Driver Association ka pynrem jur ïa u nongpyntrei u Aaron Nongkynrieh u ba pyntrei ïa ka surok PMGSY na Shngimawleiñ ha ka jingjrong kaba 3.42 km.
Kane ka surok ha jingshisha la dei ban maramot naduh u snem 2020 hynrei na ka daw jong ka jingktah jong u COVID-19 ka seng ka la sngap noh shwa halor kane la bynta. Namarkata, ha 09/06/2022 ka seng ka la leit ïa kynduh ïa u Executive Engineer jong ka PWD Mawkyrwat Division bad da kaba shai u ong ba la dep ïa pynbeit ban maramot ïa kane ka surok namar ba ka por ban maramot ka dang sah.
“Kaba sngewphylla ka long ba une u nongpyntrei u shim kabu namar ba kane ka surok ka dei ha nongkyndong ngan leh katbamon”, ong ka seng. Kumta na ka liang jong ka seng ka pynrem jur ïa kum kine ki jait briew kiba khwan myntoi shimet khlem da pyrkhat ïa kiwei kiba ïa kynduh jingeh khamtam mynta lei da ka jingpynjot ka mariang kane ka surok ka la nangsniew nangsniew.
Kumta na ka liang jong ka seng ka da kyrpad ïa ki bor ba dei peit ba kin phah trei noh ïa ka khnang ba ki paidbah kin khamsuk ka kit ka bah ymdei ban shu wan buh tang ki mawria ban pynbyrngia ïa ki paidbah. Kane ka long katkum ka kyrwoh khubor na u President Mawkyrwat Circle, bah T.L. Nonglait.