Palat 4 kynta na um bad ryngkew ïaid u CM ban leit jngoh ïa ki jaka ba shah pynjulor

Shillong, Jylliew 22 : U Myntri Rangbah ka jylla u Conrad K Sangma ryngkat bad u MLA u Brening A Sangma mynta ka sngi 22 tarik ki la shong da ka lieng palat 2 kynta na Siju sha sha Karukol bad lai kynta duna pat da ka kjat na Siju sha Rongdong ban leit jurip ïa ki jaka ba la shah pynjulor ha ka jingther u lapbah bad jingshlei um ha South Garo Hills.
U Myntri Rangbah u la ïohi da la ki jong ki khmat ba ki jingshah pynjulor ki long kiba la jur haduh katta katta bad kiba ym pat ju jia mynno mynno ruh ha rilum Garo hapdeng kine ki snem wat la ka jingshlei um ka ju jia man la u snem ruh. “ Ki jingjulor ki long kiba la jur shisha haduh katta katta ha kaba ïa ki surok sha Siju bad Maheskhola la pyndkut noh da ka um bad mynta la hap ban phah wanrah jingbam da ki helikopter jong ki Shipai Suiñ ne ki Indian Air Force (IAF). Ban long biang ban ïaid ki kali na kine ki surok kan shimpor da ki taiew lynter. ïa ka krem Siju kaba dei ka jaka jngohkai ki nongwan jngohkai na kylleng ki ri ruh la pynjulor da ka umsaw. Ki paid nongshong shnong jong katei ka thaiñ kim pat ju ïohi ïa kiba kum kine ki jingshah pynjulor na Rongdong shaduh Siju. Ki wahduit ki la kylla wahbah bad ki ki maw ba heh baheh ki la hap ha ki surok. Hooid ban long biang kumba ju long ka leit ka wan da ki kali kan shim por da ki bnai ban shna hynrei wat la katta ka sorkar kan ïai pyrshang beit katba lah ban pynsted ïa ki jingpyntrei khnnang ban ym shah ktah eh ki paidbah” ong u Myntri Rangbah.
U Myntri Rangbah u la ai ruh ka jingïaroh bad khublei ïaki shipai Suiñ ki Indian Air Force (IAF) kiba la kloi ban ïarap ïa ka jylla ban leit ki ïa ki marbam da ki helikopter sha Maheskhola naduh hynnin haduh mynta ka sngi. Mynta ka sngi ki IAF ki lah ban pynpoi haduh 2.4 ton ki marbam ha Maheskhola. Ka jingkyrpad ka long ba kin pynpoi sha Siju bad Mahadev ruh.
Kumjuh ruh u Myntri Rangbah ula ai khublei ruh ïa ki BSF kiba la ïarap ha ka jingleit jngoh jongu ïa ka BSF Campus ha Dobasipara, Tura khappud ka West bad South Garo Hills District.
ïa u Myntri Rangbah la pdiang da u Alok Kumar Singh DIG SHQ BSF Tura. U CM ula ïaroh ïaki BSF kiba la ïarap ïa ki paidbah khamtam ha khappud ha ka por jong ka jingshlei um ban pyllait im ïa ki bad kumjuh ruh ban ïarap marbam kyrkieh ruh ïa ki.