Shillong, Jylliew 22 : U Director General of Police ka Jylla, u Dr. LR Bishnoi ha ka sngi Balang u la pynpaw ïa ka jingsngewkhia namar mynta u drok u ba dei u nongshun jong ki samla u la poi mynta wat sha ki bynta ba kyndong jong ka jylla ruh.
Haba kren ïa kane kum u Kongsan hadien ba la kut ka jingïalehkai phutbol paralok hapdeng ka District Executive Force, East Khasi Hills jong ka Meghalaya Police bad ka Shillong Press Club kum shi bynta ka jingrakhe ïa ka International Day Against Drug Abuse and Illicit Trafficking, u DGP u la ong ba mynta u drok u la saphriang kylleng ki bynta jong ka jylla.
Da kaba kam ba ka long kaba donkam haduh katta katta ban ïakhun lang ban ïoh ïa ka imlang sahlang kaba lait na u drok ha Meghalaya, u DGP u ong ruh ba ki pulit ki la shim bun ki sienjam ban khanglad.
U la ong ruh ba ka tnad pulit ka la ju pynlong bun bha ki jingai jingpynshai bad jinghikai i aki paidbah bad wat ki jaka pule ba kin sngewthuh ïa ki jingma bad ki jingsniew kiba mih na kaba ngop ha u drok. U ong ruh, “Mynta ki pulit ki la leh ïa kaba paka tam da kaba buddien bad peitsiar ïa kito ki nongkhaii drok kiba don ha ka jylla.” Katkum ka jingong jong u, ki la don bun bha ki nongkhaii drok kumjuh ki nongdie khutia ïa ki drok.
Na ka liang jong u, u pynpaw ruh ba ki kwah ban ïohi ba man la ki nongshong shnong ka jylla kin long kiba suk ba kmen, ba koit ba khiah bad lait na kitei ki jingshyrkhei baroh jong u drok.
U DGP u la pan ruh ka jingïatrei lang jong baroh ki paidbah kynthup ïa ki lad pathai khubor ba kin snohkti lang bad ki pulit khnang ba ki paidbah kin tip bad kham ïoh jingshai shuh shuh ïa ki jingshyrkhei jong u drok.
Ha kane ka sngi ba don ka jingïalehkai paralok la donlang ruh kiwei ki heh pulit kynthup naduh u IG Mukesh Singh, DIG Eastern Range Davis R Marak, SP East Khasi Hills Bah Sylvester Nongtnger, SP (Shillong City) Bah Vivek Syiem bad ruh u President ka Sihllong Press Club, Bah David Laitphlang.
