Shillong, Jylliew 22: Ka Executive Committee jong ka KHADC, kaba la long mynta ka sngi, ka la rai ba nangnen shakhmat, kan nym pyllait pisa shuh sha ki MDC ha kaba ïadei bad ka Discretionary Grand, katba ym pat ïoh shuwa ïa ka Utilisation Certificate.
U Chief Executive Member, u Bah Titos Chyne, haba ïakren bad ki nongthoh khubor hadien ba la wai ka jingïalang jong ka EC, u la ong ba kawei na ki jinglap jong ka CAG Report ha ka snem 2011-2012 bad 2012- 2013, ka long ba bun ki MDC kim ju ai jingkheiñ ne wan submit ïa ki Utilisation Certificate haba ki pyndonkam ïa ka Discretionary Grant bad dei namar kane ka daw ka ophis u CAG ruh kam ïoh ban kheiñ ban diah ne ban audit ïa ka psia jong ka Council. “Nangne shakhmat ngin hap leh noh da kane ka rukom khnang ba kan don ka jingbuh jingkheiñ kaba biang”, la ong u CEM da kaba bynrap ba ka shong pat ha ki MDC kumno kin pynïoh ïa kine ki UC.
U la ïathuh ba kane ka Grant ka long hapdeng 50 hajar ne 1 lak tyngka shi snem.
‘ Ha kajuh ka por u CEM, u la ïathuh ruh ba ka EC ka la rai ruh ban thung da u Chartered Accountant (CA) uba tbit ban ai jinghikai ne ban btin lynti ïa ki ophisar bad ki nongtrei ka tnad Finance ha ka rukom buh bad pynrung jingkheiñ ïa ka pisa pilaiñ jong ka Council. U la ïathuh ruh ba une u CA un neh katba dang shah ka kam.
