Nongstoiñ, Jylliew 22: Ka UHM West Khasi Hills District Unit kata ka Mawduh Unit kaba hap hapoh ka Nongstoiñ Circle, ha ka jingïalam jong u President ka Unit kata U Samla Bantei Kharbani, ka la ïoh ban bat ïa ar ngut ki bar jylla kiba na West Bengal kiba thmu ban wan tyrwa die tïar hapoh ka dong ka thaiñ jong ka Nongstoiñ.
La ïoh bat ïa kine ryngkat bad uwei u Khasi ba ñiah ïa ka kali Tourist ML05 W 6101, hadien ba lah tohkit bniah da ki dkhot ka seng lah lap ba kine ki dkhar kim biang wat ki kot ki sla bad kumjuh ruh kim dei hi ruh ba napoh kane ka jylla. Ka seng ka la maham jur ïa kine ki bar jylla bad kumjuh ruh ïa une u driver khasi, ba um dei ban pynshlur ïa kum kine ki jaitbynriew ba nabar ban wan ïalam buhai shnong ha ka khaïi pateng hapoh ka District. Ka buh ruh ka jingkylli sha ka Sorkar ba balei bad shaei kata ka ILP kaba kum ka seng hi baroh kawei ka lah dawa ?
Ka kyrwoh ba ka seng ka kwah ban ai sha ki paidbah ba ka seng United Hynñiewtrep Movement, kan shim hi noh ïa ka sien jam ban pyrshah bad ban ym ailad ïa ki mynder ban wan buhai shnong lyngba ka khaïi ka pateng, hapoh ka West Khasi Hills District bad kan nang ïai khynra ïa ki bar jylla ki bym biang kot bad kan ïai beh ïa kum kine na ka dong ka thaiñ.
Ka kyrwoh ka UHM West Khasi Hills District hapoh ka jingïalam U President ka District U Samla Moonstar Nongrem, ka pyntip ruh lyngba u ne u kyrwoh ba kan sa leit hiar sha Shallang ha ryngkat ka jingïadon lang ka Mawshynrut Circle hapoh ka jingïalam U Samla Steven Nongsiej, ban khynra ïa baroh ki Coke Factory bad kumjuh ruh ki dukan ba shong da ki bar jylla.
Lada ka lap ba kim biang ki kot ki sla kam banse ban shim da ki rai ba tyngeh ban pynher krad noh ïa kine ki mynder ba don hangne, kane ka long katkum na ka kyrwoh lyngba u President ka District Samla Moonstar Nongrem.
