New Delhi, Jylliew 22: Ki Liang Pyrshah ha ri India ki la rai ban sei kyrtong President da u Yashwant Sinha, uba long u MP barim ka BJP.
Ïa kane ka rai la shim ha ka jingïalang jong ki Liang Pyrshah kaba la long mynta ka sngi ha Parliament Annexe hapoh ka jingpynïaid u hehduh ka NCP, u Sharad Pawar.
U Sinha udei ruh u IAS barim jong ka ri India bad u Myntri ka tnad Finance barim jong ka sorkar pdeng ha ka por jong ka sorkar u Atal Behari Vajpayee bad kumjuh ruh ka sorkar Janata Dal jong u Chandea Shekhar.
U Sinha, uba la 85 snem ka rta, udei na Bihar, ha kaba u la pyndep ruh ïa ka Master Degree ha ka Political Science na Patna University bad u la hikai ruh ha kane ka skul bah. Ha u snem 1960 u la pyndep ïa ka IAS bad u la bat bun tylli ki kam haduh 24 snem. U la iehnoh ïa ka kam IAS ha u snem 1984 bad rung sha ka Janata Party. U la bat kum u General Secretary bad shah jied kum u MP ha u snem 1988.
Hadien u la rung sha ka BJP bad ha u snem 1996 u la long u National Spokesperson ka Seng. Ha u 2018 u la iehnoh ïa ka BJP hadien ba i la shah pynduh ticket ban ïakhun na ka Constituency ba u ju jop MP. Hynrei ha us nem 2021, u la pynïasoh noh sha ka Trinamool Congress bad bar kum u National Vice President. Hynrei u la iehnoh ïa ka TMC ha shuwa ba un shah jied kum u kyrtong ki Liang Pyrshah.
