Khliehriat, Jylliew, 24: U Bah Lektor Dkhar uba long u nongwad RTI u la phah da ka dorkhas sha u MP ka Shillong u Dr Ricky AJ Syngkon da kaba kyntu ba un tuklar lem ha kaba ïadei bad ka jingpynslem ban pyntreikam ïa ka skhim Jal Jeevan Mission (JJM) hapoh ka Jylla.
U la ong ruh ba u kyrmen skhem ba ka jingshimkhia lem jong u MP halor kane ka jingeh kaba la ktah jur ïa kiba bun ki nongshong shnong ha ka jylla namar ka jingpynslem ban pyntreikam ïa ka JJM hapoh ka jylla Meghalaya.
“Ka jingthmu jong kane ka skhim ba la pynbna ha u snem 2019 da u Myntri Rangbahduh ka ri India ka long ban pynthikna ban pynïoh ïa ka umbam umdih kaba khuid bad shngaiñ ha manla ki thliew ïing kat haduh u snem 2024. Kane ka skhim ka long kaba kongsan ban kyntiew ïa ka koit ka khiah jong ki paidbah, ka jingkhuid jingsuba bad ha baroh ki bynta jong ka jingim khamtam ha ki thaiñ nongkyndong,” u la ong.
U la ong, ha Meghalaya ka jingpyntreikam ïa kane ka skhim ka long kaba suki, ka bym pynhun bad ka bym shai satia, watla ka la ïaid la buntylli ki snem, hynrei kiba bun ki shnong kyndong kim pat ïoh satia ïa ka umbam umdih kaba biang kaba long markhongpong ïa ka thong kumba la thmu.
“Ban shai halor kane ka jingïaid jong kane ka project, la pan da ka RTI, watla katta ka jubab kaba la ïoh pdiang na ka ophis JJM kaba la pynshong nongrim tang ha kaba ïadei bad ka East Jaiñtia Hills District.Ka jingai jingtip kam shym la long kaba bniah bad ka la pulom ruh bad pynpaw ïa ka jingsngewkhia kaba ïadei bad ka jylla hi baroh kawei.Ka ophis ka la pyntip ruh ba ïa kiba bun ki kam la lah ban pyndep ha kiba buntylli ki shnong bad la ai ruh ïa ki syrnot hynrei katkum ki jingïoh jingtip ki nongshong shnong ha kine ki shnong ki sakhi da kumwei pat”
“La ïathuh ba la pynpoi um tang shisien ne arsien ha ka shitaiew, bad ha ki katto katne ki jaka ym ju ïoh um thikna wat hadien ka jingkam ba la pyndep pura ïa ka jingpynpoi um,” ong u bah Lektor Dkhar.
“Kane ka la wanrah ka jingsngewkhia kaba jur, bad lada kane ka jingdkoh ka don ha East Jaiñtia Hills District, lehse kane ka jingeh kan long ruh kumjuh ha kiwei pat ki district jong ka Jylla.Ki nongshong shnong ha kiba bun ki bynta ka jylla ki dang bteng ban mad ïa ka jingeh namar ka jingpynslem ïa ka jingpyntrei, ka jingbym pynpoi um lane ka jingpynïasoh kor um sha ki ïing ka bym treikam satia.Ki don ruh ki khubor ba don ki kontaktor kiba pynslem khnang ïa ka kam, kata lehse namar ki kam shimet ne ki jingïoh nong shimet kaba la pynsuba jur halor ka kam bamsap bad jingpyndonkam bakla,” u la ong.
“Halor kine ki nongrim ba la kdew, nga kyrpad ïa ka jingtuklar lem ka jong phi da kaba rah ïa kane ka mat hapoh Parliament kumjuh bad ka Tnad Jal Shakti khnang ban pynpaw halor ki jingshisha ha kaba ïadei bad ka jingpyntreikam ïa kane ka skhim JJM ha Meghalaya,” u la pynpaw ha ka shithi.
Une u rangbah u kyrpad ruh na ka bynta ban pynlong da ka jingtohkit kaba laitluid lane ban leh ïa ka audit halor ka jinglong jingman jong kane ka skhim ha baroh ki district jong ka Jylla.
U kyrpad ruh ïa u MP ba un bthah ïa ki bor ba dei khmih ba kin bishar bniah biang bad pynthikna halor ka jingkam da ka ophis ka State JJM ba la pyndep ïa kane ka project bad ban pynthikna ba kito ki shnong ki bym pat ïoh ïa ka jingsam um kaba thikna kim dei ban shah pynbna kum kiba la dep pura.
U la kyntu ruh ban shim ka jingpynshitom halor kino kino ki jingleh sting, ki jingpyndonkam bakla ïa ka pisa lane ki kam bamsap da kaba pynlong ïa ka jingtohkit kaba bniah.
