Nongpoh, Jylliew 24: Ki nongïalam ka RBYF sengkmie ha ka sngi baar ki la leit sha ka thaiñ Mawhati ban pynskhem ïa ki nongkitkam ba la jied thymmai jong ka Mawhati Circle na ka bynta ka samoi treikam jong u snem 2025-28.
Ha katei ka sngi ka jingpynskhem ïa kitei ki nongkitkam ba thymmai ka Mawhati Circle la pynlong ha Ïing Dorbar Mawhati ïa kaba la pynskhem da u Bah Liander Nongshli, Working President ka RBYF sengkmie, ha ryngkat ka jingdon u Bah Rj Thangkhiew, Political Secretary, u Bah Bawantipor Marwein, Finance Secretary, u Bah Phrangsngi Kylla, Chief Organizing Secretary, u Bah Neversad Makdoh, Sports Secretary lem bad kiwei.
Ki nongïalam ba thymmai ka RBYF Mawhati Circle, ki kynthup ïa u samla Phrangsngi Bakash kum u President, u Pinky Diengdoh kum u General Secretary, u Francisco Shadap kum u Vice President lem bad kiwei kiwei.
Na ka liang ki nongïalam ka seng haba kren ha katei ka sngi kila kyntu ïa kitei ki nongïalam ba thymmai ban long ki samla kiba kit khlieh ïa ka lyngkor ba la bynshet ha ki ban shakri na ka bynta ka bha ka miat ki paidbah ha katei ka thaiñ khamtam ban long ki samla kiba long ka nuksa ïa ka shnong ka thaw bad ka imlang ka sahlang.
