Shillong, Jylliew, 23: Tang hapoh khyndiat sngi ba la kynnoh ba ka don ka jyrsieh bamsap ha ka jingpyntrei ïa ki Civil Work Infrustructure da ka Megalaya Health Systems Strengthening Project (MHSSP) ba la bei pisa da ka Asian Development Bank (ADB), ki ar tylli ki sengbhalang, kata, ka Ri Bhoi Youth Welfare Organization (RBYWO) bad ka Confederation of Ribhoi People (CoRP) ki la pynpaw ïa ka jingsngewsih halor ka jingbakla ba khlem da iit bniah shwa ïa ka jubab RTI ba la ïoh pdiang ha shwa ban phah sha ki lad pathai khubor.
U kyrwoh ba la phah ha ka Lah Sngi u Blei da u President ka RBYWO Bah Ban Kharnaïor bad u Finance Secretary ka CoRP u Bah Shining Kyntla ki la ong, “halor ka jingpyntrei ïa ka OT ha Bhoirymbong CHC kaba ka Abstract Estimate ka dei T. 84,00000 katba ïa ka Bill la siew haduh T. 10,476,036.19 kaba tam haduh 20 lak bad ba la kynnoh ba ka don ka bamsap ngi sngewdei ban pynshai na ka jingtrei ïa ka Complete Renovation Umsning CHC kaba la kot T. 48,000,000, ka Extension jong ka OT Bhoirymbong T. 8,400,000 bad ka Upgradation jong ka SC sha ka IPHS Standard Type B-SC bad ka Labour Room, ka Indoor Facilities ha Mawlyndep kaba T. 7,500,000 la pynhap lang tang ha kawei ka Package kaba long baroh T. 63,900,000, hynrei katkum ka jingpynmih ïa ka notis ban pyntyllun shakhmat ïa ka kam kaba la pynmih ha ka 25 tarik, Nailar, 2021 sha u Bah B.D Marbaniang lah shu ai kyllum katkum ka Bid Price kaba T. 5,83,29,743.00 klur khlem da pynshai shuh kawei kawei katkum ka Bidding ba i ïoh da kaba pynhiar sha ka T. 40,740,906.22 ïa ka Complete Renovation Umsning CHC, ka jingpynkiew ïa ka Extension jong ka OT Bhoirymbong sha ka 10,476,036.19 bad ka Upgradation ïa ka SC sha ka IPHS Standard Type B-SC bad ka Labour room, Indoor Facilities Mawlyndep da T. 7,112,801.22 kaba long jingkheiñ ka long katei kaba lah kdew haneng ba i ïoh.”
“Kumta ngi pynshai ba ka jingkynnoh ka jong ngi kam shonghok ïa u Bah B.D Marbaniang bad ngi sngewsih ïa ka jingbakla jong ngi khlem da iit bniah bad ka jingbymshai ka jubab na ka jubab RTI ba ngi ïoh pdiang,” la pynpaw ki nongïalam jong kine ki ar seng.
