Nongpoh, Jylliew 23: Ka SOS Children’s Village, Shillong mynta ka 23 tarik Jylliew kala rakhe ïaka SOS Day kaba dei ka sngi lehkmen ba shisien shisnem jong baroh ki tnad jong ka SOS haka ri India baroh kawei kaba dei ruh ka sngikha jong u Dr Hermann Gmeiner u ba dei u nongseng ïaka SOS Village ha kylleng ka pyrthei.
Ïa ka SOS, Childrens Village Shillong la seng ha u snem 1999 ryngkat ka thong ban lum ban lang ban peit bad khmih ïaki khynnah rit kiba shem jingeh bad kiba wan shisha na ka longiing ba duk ba rangli, ki bym don shuh ki nongsumar bad ban pynlait naki naka jinglong khunswet namar lyngba ka SOS kala long ka jingkmen ïa kiba bun ki iing ki sem bad ka imlang ka sahlang namar ki jingphohsniew kila urlong ïa ki khynnah kiba donkam shisha ka jingïarap bad ka jingkyrshan ryngkat ka jingnang jingstad.
Ha katei ka jinglehkmen ïaka SOS Day la wan ruh ban sakhi bad ai mynsiem da u Bah Damanbait Lamare MLA ka Umroi kum u kongsan haka jingdonlang u Bah KC Lywait OC ka Umiam PS, Amar Jyoti Sarmah Village Director ka SOS Children’s Village Shillong.
Ha katei ka sngi hapdeng ka jingkmen bad ka jingiphuh iphieng watla ki dei tang ki khunshwet, ki heprit kiba don hapdeng ka jingshah sumar bad ka jingpeit jingkhmih da ka SOS, kila shim bynta ruh haki jingshad bad ki jingrwai bapher bapher, bad hakajuh ka por naka liang ki bor pynïaid kila sam ruh ïaki khusnam sha kito kiba wan shakhmat haki jingpule bad ki eksamin.
U Bah Damanbait Lamare haba kren ha kane ka sngi kum u kongsan u la ong ba ka dei kaba kthang ban iohsngew ba ki khynnah kiba don ha katei ka jaka sumar kim don shuh ki kmie ki kpa, namar bun ngim sngewthuh ïaka dor jong ki kmie ki kpa katba ki dang donlang ha kane ka pyrthei kaba la pynlong ruh ïa utei u MLA ban lung mynsiem namar wat hapdeng ka jingbym don shuh ki kmie ki kpa, hynrei kitei ki heprit ki shad ki kmen bad suk mynsiem.
U la ai ruh ka jingkitbok ïa katei ka SOS kan dang kiew shaphrang bad dang lah shuh shuh ban ai ka jingshakri sha ki heprit kiba don hapdeng ka jingeh jingjynjar, ban pynmih ruh ïaki soh bathiang namar kumba la pyntip da ki bor pynïaid bun hi ki khynnah bala peit bad khmih da ka SOS ki longbriew manbriew haka jingim bad kyntu ruh ïa kitei ki heprit ban minot bad pyndonkam hok ïaka sap kaba ki don khnang ba kin long ki samla kiba don ka jingkitkhlieh ïaka imlang ka sahlang hadien ba kila heh la san bad ruh ba kin poi sha ka thong kumba ki angnud haka jingim jong ki.
