Nongstoiñ, Jylliew 23: Uwei u rangbah ba la 59 snem ka rta, u la ïap ha ka jingïashoh bad la u jong u kynum, kaba la jia ha ka janmiet sngi U Blei ha ka shnong Mawkhlam Nongpyndeng, Nongstoiñ.
Katkum ka khubor Pulit, une u rangbah ba ïap u kyrteng u Silbelius Kharbani. La ong ba u la ïap na ka jingïashoh bad la u jong u kynum ba kyrteng u Pranding Nongkhar, u ba la 54 snem ka rta.
Kane ka jingjia kala jia ha ka jaka bam phlang jong ki jingri jingdup kaba jngai tang shi pda maw na ka ïing ba ki sah ha Mawkhlam. La ïathuh ba ka daw ka jingïashoh ka dei namar ka jingshoh u khawiang.
Ki Pulit ka Crime Scene Unit na ka Directorate of Forensic Science, Shillong, ki la hiar sha katei ka jaka ban lum ïa ki sakhi satar, katba u bah Pranding Nongkhar u la don mynta ha ka jingtohkit jong ki Pulit.
