Shillong, Jylliew 23: U Myntri Rangbah ka jylla Meghalaya u Conrad K. Sangma ha ka sngi Nyngkong u la pynlong ïa ka jingïalang CM Connect hapoh ka shnong Mawkdok kaba hab ha Laitkroh C&RD Block ka East Khasi Hills.
Ha kane ka jingïalang la sakhi ïa ka jingïashim bynta ki paidbah, ba kynthup ruh ïa ki nongmihkhmat na ki shnong bapher bapher kiba la pynpaw ki jingsngewkhia haba ïadei bad ka jingbym biang ki surok ban pynïasoh ïa ki shnong, ka bording elektrik nangta ki lad jingsumar, ki ïing, ka um ban dih, nangta ka jingdon ki bank, bad ka jingpyntreikam ïa ki skhim ka jylla bad ka sorkar pdeng kum ka PMAY, NFSA, bad Jal Jeevan Mission.
Haba kren ha kane ka programme, u Myntri Rangbah u Conrad K. Sangma u la ong, “Ha ka CM Connect, ngi kren duna bad ngi sngap khambun. Kane ka rynsan kam dei satia ka jaka ban ïa kynnoh ne ban wad daw hynrei ka dei ka lad ka lynti ban sngap, ban khmih bniah bad ban trei ïa ka kam. Baroh ngi dei ki bym biang bad ngi bakla hynrei kaei kaba kongsan pat kadei ban ïakren lang khnang ba ngin lah ban pynbeit ïa ki jingeh bad ban ïaid shakhmat ïa ki kam.”
U Myntri Rangbah u la pyntip ruh ba ka thong ba kongsan ka CM Connect ka long ban sngap na ki nongshong shnong ban pynsngew ïa ki jingeh jong ki sha ka sorkar ba kan lah ban trei ïa ka kam.
U la pynpaw ruh ka jingai khublei ïa u MLA u Bah Gavin Miguel Mylliem bad u Bah Matthew Beyond Kurbah, bad kumjuh ruh ïa ki ophisar kiba la donlang ha kane ka sngi.
Ha kane ka programme, u Myntri Rangbah u laiathuh ruh shaphang ka Mawkdok Skywalk Project kaba dei ka kam jngohkai ban kyntiew ïa ka ïoh ka kot ki nongshong shnong.
Ha kane ka sngi u Myntri Rangbah u la pynpaw ruh ïa ka jingdonkam ki paidbah ban pynïasoh ïa u Aadhaar ha manla ki skhim bapher bapher kaba dei ban kut ha ka 30 tarik mynta u bnai ba kin ïoh ki lad jingmyntoi kum ka PMAY, MHIS, NFSA, bad ki job card.
Kum ka jingpyrshang ban pynkupbor ïa ki shnong ba kin kyntiew ïa ki kam sengkam lajong ha Mawkdok ïa ka bam la pynkhreh da ki Self-Help Groups (SHGs) na ka shnong.
