Shillong, Jylliew 23: Ka Khun Hynñiewtrep National Awakening Movement (KHNAM) ha ka sngi Nyngkong ka la dawa ïa ka Sorkar Jylla ban sam ïa ka kaiphod jong ka Expert Committee halor ka State Reservation Policy (SRP) sha baroh ki seng saiñ pyrthei ka Jylla naba kane ka long kaba kongsan.
Kat kum ka kyrwoh na u Working President ka KHNAM Bah Thomas Passah, ka Committee kaba khlieh da u Justice (Retd) MC Garg, ka la dep aiti ïa ka kaiphod sha ka Sorkar hadien ka jingbishar thymmai ïa ka State Reservation ba don mynta ha Meghalaya.
U la ong ruh ba ka Expert Committee, kaba la thaw ha ka 12 tarik Nailur, 2023, ka kynthup ïa u Justice (Retd) Dr Satish Chandra, Prof DV Kumar, Prof Chander Shekhar, bad Prof Subhadip Mukherjee kum ki dkhot. Ka kam jong ka Committee ka long ban shong bishar biang ïa ka State Reservation Policy da kaba shim ïa ki jingai jingmut na baroh ki kynhun bapher bapher ka Jylla.
Na ka liang u Bah Passah ula ong ba baroh ki seng saiñ pyrthei, ki sengbhalang bad ki kynhun bapher bapher ki la ïakynduh ïa ka Committee bad aiti ïa ki jingpynsngew bad ki jingai jingmut. U Bah Passah u la ban jur ba ka long kaba donkam ban pynïoh ïa ka kaiphod sha baroh ki seng saiñ pyrthei khnang ba kin ïoh ban pule bniah bad nang ïoh ban ai shuh shuh ïa ki jingthoh sha ka Sorkar lada donkam.
U la ong, “Kum ka party ngi sngew ba ïa ka copy jong ka kaiphod ba la aiti da ka Committee dei ban ai sha baroh ki seng saiñ pyrthei khnang ba kin ïoh ban pule bad nang ai shuh shuh ïa ki jingthoh sha ka Sorkar lada donkam.”
Ka Sorkar Jylla ka la thung ïa ka Expert Committee ban shong bishar biang ïa ka Reservation Policy u snem 1972, kaba ai bhah 40% ban ïohkam Sorkar ïa ki paid Khasi-Jaiñtia, 40% ïa ki paid Garo, bad 5 % ïa kiwei kiwei ki riewlum ka Jylla.
Ha kajuh ka por, kumba la bynshet kam da ka Kynhun Myntri, u Chief Secretary Bah DP Wahlang dang shen ula pyntip dang shen ba un sa shong pule bniah ïa ka kaiphod jong ka Expert Committee bad un sa aiti ïa ki jingai jingmut halor ki sienjam ki ban shim da ka Sorkar haba ïadei bad ka State Reservation Policy, hapoh ka 31 tarik Nailar.
