Nongpoh, Jylliew, 22: Shi bynta ban lum jingtip halor ka jingtreikam ki Pulit ban wan rah ïa ka shongsuk shongsaiñ bad ka bha ka miat ki paidbah ha ki shnong ki thaw, ki khynnah skul ka Alpha English Higher Secondary School na ka Class-XI, nalor ka jingpule puthi ha ki skul, ki la leit ban iuh kjat ha Nongpoh Police Station ha ka sngi Thohdieng, kaba long shi bynta ban wad jingtip halor ki rukom treikam ki pulit bad shakri ïa ki paidbah.
Ha ka jingïalam ki nonghikai, kitei ki Khynnah Class-XI ka Alpha English Higher Secondary School Nongpoh, ki la ïoh lad ban ïa kynduh ïa ki pulit ophisar ka Nongpoh Police Station, kiba la pdiang sngewbha bad ai ruh ka jingpynshai halor ki nongrim ka jingtreikam ki pulit kumba la pynkup bor da ka sorkar.
Kumba 39 ngut ki khynnah skul katei ka Alpha English Higher Secondary School, Nongpoh ki la ïoh lad ban ïa kynduh markhmat bad ki pulit ophisar ban lum jingtip ïa ki rukom treikam ki pulit ha ki bynta bapher bapher na ka bynta ban wan rah ïa ka shongsuk ka shongsaiñ ha ka jylla.
Ha katei ka sngi, la don ryngkat ruh naduh u Officer In-charge ka Nongpoh Police Station u M.R Marak, u Officer In-charge ka tnad Traffic u Rubul Ali lem bad kiwei kiwei ki pulit ophisar.
Ki phang ba hakhmat eh ba ki pulit ophisar ki la ai jingshai sha kitei ki khynnah skul ki kynthup ïa ka rukom treikam ka Police Station, ha kaba ïa khun pyrshah ïa ki kam sniew ba la tip kum ka Crimes and Criminal tracking network system, cyber-crimes, ki kyndon ka Traffic rules, ka national emergency respond system bad kiwei kiwei ki bynta ba ki pulit ki treikam ban ïa khun pyrshah ïa ki kam sniew bad ban pynlong ïa ka District bad ka jylla kaba shongsuk shongsaiñ.
Lyngba kane ka jngleit wad jingtip halor ka rukom treikam ki Pulit, kitei ki khynnah skul ki la ïoh lum jingtip shibun eh halor ka rukom treikam ki bor pulit, nalor ka kam kaba ki pule ha ki skul ban lum jingnang jingstad bad ruh kin sngewthuh kumno ban ai jingïatrei lang ha kaba ïa khun pyrshah ïa ki kam sniew.
