Nongstoiñ, Jylliew, 22: Ka sngi saitjaiñ, 22 tarik Jylliew, ka dei ka sngi kaba kyrpang kaba la tip kum ka World Music Day ha kaba ki briew ha ka pyrthei shityllup ki rakhe khamtam eh ki kynhun tem bad kynhun rwai.
Ha kaba ïadei bad kane, u Bah Dominik Lyngkhoi u kaitor ba pawnam uba sah ha ka shnong Mawlangdep, West Khasi Hills kaba jngai kumba 11kilomitar na Nongstoiñ harud ka surokbah National Highway 44 (E) Shillong- Tura uba dei ruh u nongshna ïa ki tiar tem tiar put tynrai kiba paka u la pynpaw ïa ka jingsngewbynñiaw halor ka jingbym shimkhia jong ka Sorkar ban pynlong ïa ki prokram ba kyrpang ha manla ki district da kaba khot ïa ki samla kiba don sap ha ka tem ka put khnang ban kyntiew ïa ka sap ka jong ki.
Nalor kata, u la ong ruh ba ha ki snem ba mynshuwa ka don kawei ka kynhun tem sur tynrai kaba la tip kum ka Hynñiewtrep Tradditonal Cultural Welfare Organisation (HTCWO) kaba la shah khot ha ki prokram bapher bapher.
U Bah Lyngkhoi naduh ba u dang khynnah u ieit ïa ki tiar put tiar tem tynrai jong ka jaitbynriew bad u ju sngewtynnad bha ban wad jingtip kumno ki longshuwa manshuwa ki pyndonkam ïa ki tiar tem bad ha kiba kum kino ki por ki ju pyndonkam.
Haba batai bniah shaphang ki tiar tem tynrai jong ka jaitbynriew Khasi, u Bah Lyngkhoi u la ong ba ka jaitbynriew Khasi ka dei kaba riewspah tam ha ki tiar tem tiar put bad ka jingpyndonkam ïa ki ruh ka ïapher katkum ka jinglong ka kam.
U la ong ruh ba katto katne ki rukom pyndonkam jong ki longshuwa ïa ki tiar put tiar tem ki long ha ki por ba kiew ïng thymmai ki pyndonkam da kiwei ki tiar tem, ha ka por thang metïap briew ki pyndonkam da kiwei ki tiar, ha ka por ba ki shad kynting snem ki pyndon kam da kiwei, ha ka por thep mawbah bad ha ka por ba ki kñia, ki phur ki siang ki pyndonkam da kiwei.
U la ong ruh ba watla ki tiar put tiar tem ba ki longshuwa ki ju pyndonkam kidon da ki spah jait hynrei napdeng jong baroh ki tiar ka Tangmuri ka dei ka Syiem jong ki tiar put tiar tem baroh kiba ki longshuwa ki ju pyndon kam.
U la ong ruh ba ka jing pyndon kam ba kongsan ïa ka Tangmuri ka dei ha ka por ba kii pynlong ïa ka jingshad suk mynsiem.
Ha kajuh ka por u la ong ba ki don ki jait jingput kiba la shna da ki siej kum ka tanglot, ka besli, ka sharati. Nalor kine ki jingpynshai ha kaba ïadei bad ki tiar put tiar tem u la ong ba ki don kiwei pat ki jait jingtem kiba u la lap thymmai kum ka shitara bad kiwei kiwei.
Nangta, u la ong ba kawei ka jait jingtem tynrai kaba la duh jait ka dei ka Marynthing hynrei mynta u ladep ban shna kawei tangba um pat lah ban pynthikna la ka Marynthing la pyndonkam ban teh katno tylli ki ksai bad ha kano ka rukom ki tem ïa ka tangba u dang pyrshang katba lah ban wad jingtip lut ha kaba ïadei bad ka rukom pyndonkam ïa kane ka tiar tem tynrai.
