Shillong, Jylliew 21: Ka Mawkasiang, ka Lapalang bad ka Them Rangshken ki la jop ïa la ki jong ki jong ki jingïalehkai hynne ka sngi Saitjaiñ ha ka lympung ïalehkai jong ka Shillong Sports Association U-20 Fourth Division 2025 ha madan First Ground- SSA Stadium.
Ka resol jong baroh lai tylli ki jingïalehkai ki long kiba shongkun ha kaba ka Mawkasiang ka la pynliem suk da 3-0 kol ïa ka Summit Football Academy, nangta ka Lapalang ka la jop da 2-1 kol ïa ka Nongthymmai Nongkynrih, bad khatduh ka Them Rangshken ka la wanphai nadien ban pynliem ïa ka Lummawbah da 3-2 kol.
Ha ka jingïalehkai kaba nyngkong, ki lai kol na ka bynta ka Mawkasiang la thep da u Geoff Suting (36’min) bad ar tylli ki kol na u Kyrmen Mukhim (49′, 78’min).
Kumjuh ha ka jingïalehkai kaba bud, ka Lapalang ka la ïoh ban lamkhmat ar kol lyngba u Ryntihlang Marap (51’min) bad u Superlative Khongain (72’min), ka Nongthymmai Nongkynrih ka la ïoh ban pynphai shi kol ha ka minit kaba 73 lyngba u Shain Mujai hynrei ka por ka long kaba lyngkot eh ïa ka kynhun ban wanphai.
Ha ka jingïakhun kaba khatduh, ka Lummawbah ka la pynsyrwa kai ïa ka kabu ban khur ïa ka jingjop kaba nyngkong hadien ba ka la ïoh ban lamkhmat ar sien ïa ka jingïalehkai shuwa ban shah rem.
Ka kol ba nyngkong na u Fredy Ryntathiang (23’min) la shah pynïakhaid noh ha u Elban Kurbah (27’min), nangta kaba ar na u Bajiedlang Rangslang (56′) la pynïakhaid noh da u Batisha Langstieh (62’min) shuwa ba u Neban Janong (71’min) un pynkhih ïa ka namtam na ka bynta ka Them Rangshken ban khur pura ïa ki lai point.
Ka prokram ïalehkai ha kane ka sngi Nyngkong (23 tarik Jylliew, 2025: ka Mawpdang pyrshah ïa ka Mawphlang ha ka por 10 shiteng mynstep, nangta ka Mawlyngngad pyrshah ïa ka Pynthorbah, ha ka por 1:30 baje mynsngi, bad khatduh ka Laitlulong pyrshah ïa ka Umsohsun ha ka por 4:15 baje nohphai sngi.
