SHILLONG, Jylliew 22: Man la ki jingjop kiba khraw ka sdang da ka jingphohsniew, hynrei ka jingïaid lynti jong ka Samla Rifiines Warjri ka la sdang da ka sur kaba sawa ha skhor kaba ong, “La thmu ïa phi na ka bynta kaei kaei kaba kham khraw”.
Ka samla Rifiines Warjri ka dei ka khun kynthei jong u Bah Shlurbor Kharmyndai bad ka Kong Diamondsea Warjri ba shong ba sah ha Laitkor.
Ha ka step jong ka 18 tarik Jymmang, 2025 ka Rifiines ym tang ba ka la kylla long ka kynthei kaba lai na kane ka Jylla Meghalaya hynrei ka la buh ïa ka dak kum ka nongkiewlum kaba khynnah tam jong ka Jylla, ha kaba tang ha ka rta ba 20 snem ka la lah ban kiew ïa u Lum ba jrong tam ha ka pyrthei, u Lum Everest (ha ka jingjrong kaba 8,848-mitar).
Kane ka la pynïasoh lang ïa ka lem bad ar ngut kiwei pat ki khun kynthei na kane ka Jylla ban ïoh ïa kane ka jingjop da kaba bud ïa ki dienjat jong ka Wansuk Myrthong (2013) bad ka Dolyne Kharbhih (2016).
Kaba sngewtynnat ka long ba ka Rifiines Warjri ka la shim ïa kane ka jingjop kum u mawjam ban ai mynsiem lem sha kiwei pat ki para samla jong ka Jylla.
Haba ïakren bad ki lad pathai khubor kane ka samla ka la ïathuh ïa baroh ki jingeh ba ka la hap ban mad bad ki lynti kiba jwat ba ka hap ban ïaid lyngba ha ka por ba leit kiew ïa utei u lum ba jrong tam ha ka pyrthei.
“Ban kiew ïa u lum Everest kam dei kaba suk, ka long shisha kaba jwat namar haba phi kiew ym dei ba phi donkam tang ïa ka bormet hynrei ka bor pyrkhat kaba skhem ruh ka ïaid ryngkat kaba la pynlah ïa Nga ban poi haduh kliar u lum Everest,” la ong ka Rifiines da kaba bynrap ba kane ka jingjop ka la pynkmen ym tang ïa ka hynrei ka sngew sarong ba ka la wanrah nam bad burom ïa ka Jylla hi baroh kawei.
“Ha ki samla jong ka Meghalaya, lada don kawei ka jingai jingmut kaba nga lah ban ïasam na ka jingïaid lynti ka jong Nga, ka long kane: Wat ju tieng haba phi leh ïa kano ka kam, shaniah halade…Pynleit jingmut ïa kaba phi angnud da ka dohnud baroh, bad trei shitom ban pynurlong ïa ka. , Kam pher na kano ka jaka phi wan hynrei ki jingangnud jong phi ki long kiba shisha, bad ka jinglah jong phi ka long kaba khlem pud”.
“Da ka jingkut jingmut, ka jinglong ryntih, bad ka jingngeit, ym don lum uba jrong, ym don jingangnud kaba jwat ïa ngi ban pynurlong,” la pynkut ka Rifiines Warjri.
ïa ka samla Rifiines Warjri la pdiang burom ha ka 21 tarik Jylliew, 2025 (sngi Saitjaiñ) ha Umroi Airport da ki kmie ki kpa bad kumjuh da ka 61 Meghalaya Girls Battalion NCC hadien ka jingshim bynta jong ka ha ka NCC Mount Everest Expedition 2025.
Ka Rifiines Warjri ka dei tang ka nongkiew lum kaba marwei ban shah jied na ka thaiñ shatei lammihngi baroh kawei ban ïasoh bad ka kynhun jong ka NCC kaba don 10 ngut kiba la jop ban kiew sha kliar jong u lum uba jrong tam ha ka pyrthei bad da ka jingsngew sarong ban sieh ïa ka lama lai rong jong ka India ha u Lum Everest.
Nalor ka jingkiew lum, ka Rifiines Warjri ka dei ruh ka nongïalehkai Wushu bad kickboxing kaba la tbit bha bad kaba la mihkhmat ïa ka jylla Meghalaya ha ki rynsan ïakop kiba bun jait.
