Nongpoh, Jylliew 21: Ka 61 Meghalaya Girls Battalion NCC ba la lam khmat da ka Major A.G Warjri ryngkat ki kmie ki kpa bad ka ïing ka sem mynta ka sngi da ka jingsarong ki la leit ban pdiang burom ïa ka Samla Refiness Warjri, ka nongjop ha kaba kiew ïa u lum Mount Everest haba ka la wan phai sha ka jylla hadien ka jingshim bynta ha ka NCC Mount Everest Expedition 2025 kaba la long ha ka 18 tarik u Jymmang 2025.
Ka jingsarong ïa ka jylla bad ka ri, ka dei hadien ba ka samla Rifiness Warjri, kum ka samla na ka jylla Meghalaya ka la dei tang maka kaba la shim bynta ha katei ka jingïakop kiew lum Mount Everest na ki jylla shatei lam mihngi ka ri India bad ka dei ruh ka samla kaba saw na ka jylla kaba la poi sha kliar jong u lum Mount Everest hadien 3 ngut kiba la kiew ïa u lum Mount Everest na ka jylla ba kynthup ïa ka Gary Jarman Lamare ha u snem 2012, ka Wansuk Myrthong ha u snem 2013 bad ka Dolyne Kharbhih ha u snem 2016.
Ka Samla Rifiness Warjri, kaba la lah ba kiew sha kliar u lum Mount Everest ka dei ka samla kaba dang 20 snem ka rta bad ka samla pule ka St. Anthony’s College bad ruh kum ka NCC ha ka 61 Meghalaya Girls Battalion NCC ka jylla Meghalaya.
Ban pynkynmaw, ka Samla Refiness Warjri ka la lah ban kiew ïa u lum Mount Everest ka dei ha ka 18 tarik u Jylliew 2025 ha ka jingjngai kaba 8848 metre na sla duriaw ban poi shaduh kliar u lum Mount Everest kaba la long shisha ka jingsarong bad ka jingjop ïaka bad ïa ka jylla hi baroh kawei.
Mynta ka sngi, hadien ba ka la wan phai ïing, da ka jingsarong la pdiang burom ïa ka da ka 61 Meghalaya Girls Battalion NCC ha ka jingïalam ka Major A.G Warjri ryngkat ki NCC, ki kmie ki kpa bad ki ba haïing hasem hadien ba ka la wan poi ha Umroi Airport.
Haba kren sha ki lad pathai khubor, ka samla Refiness Warjri, nyngkong eh ka la ai nguh ïa u Blei ba dei lyngba ka jingbtien lynti jong u bad ryngkat ka jingkyrshan na la ïing la sem, ka la lah ban jop ha kane ka jingïakop kiew ïa u lum Mount Everest.
Ka ai khublei ruh naduh ki kmie ki kpa, kiba haïing hasem bad kumjuh ruh ïa ka 61 Meghalaya Girls Battalion NCC bad baroh kiba la kyrshan ïa ka, ba dei lyngba ka jingai mynsiem bad ka jingpynshlur ka la ioh ïa ka mynsiem shlur ban ïakhun tyngeh haduh ban da poi sha ka thong jong ka jingjop ban poi syndon ha kliar u lum Mount Everest.
Ka la ong ruh ban kiew ïa ïa u lum Mount Everest kam dei ka kam kaba suk bad ka long kaba shitom bha bad dei tang ka jingdon ïa kata ka thong ha ka mynsiem bad ka jinglen lade ka la ïakhun tyngeh ryngkat ki jingshitom ban poi haduh kliar u lum Mount Everest kaba la long shisha ka jingjop bad ka jingkmen ha ka jingim jongka ban wan rah nam rah burom ïa ka ïing ka sem bad ïa ka jylla hi baroh kawei, ka la ong.
Kum ka khubor ai mynsiem ïa ki khun samla ka jylla lyngba kane ka jingjop, ka Samla Refiness Warjri, ka la ong ba kam don kano kano kaba ngim lah ban jop ha ka jingim, hynrei dei tang ka jingtrei shitom bad ka jinglen lade ban poi sha ka thong bad kum ki samla ruh ki dei ban don ïa ka thong ha ka jingim khnang ba kin lah ban poi sha ka thong jong ka jingim kaba ki angnud ha ka jingim, ka la bynrap.
