Ka khana jong ka jingkiew sted ka team Phutbol ki Kynthei ha ri India

New Delhi, Jylliew 22: Wat lada ka jingïalehkai Phutbol ki Kynthei ha ri India kam da paw nam eh kumba paw ka Phutbol ki shynrang, hynrei ha ka FIFA Ranking ne ka jingbuh kyrdan ka FIFA, ka team Phutbok ki Kynthei ka kam tam ïa ka team ki Shynrang. Ha ka FIFA Ranking, ki Kynthei ki don ha ka kyrdan ba 56, katba ki shynrang ki don ha ka kyrdan ba 106. Ha Asia ki Kynthei ki don ha ka kyrdan ba 12, katba ki Shynrang pat ki don ha ka kyrdan ba 19.
Ym kum ka team ïalehkai Cricket jong ki Kynthei kaba kum ka team ki Shynrang, ka la paw bha ha ka pyrthei, ka Phutbol ki Kynthei ha India kam da paw ne kam da lah than ban khring ïa ki nongpeitkai ne ki nongbei tyngka. Pynban ki dak ki shin ki sdang ban paw ba ka team Phutbol ki Kynthei ha India ka la sdang ban kiew bad sdang ban khring ïa ki bor pynïaid Phutbol ha Asia bad ha FIFA ne ha ka Pyrthei.
Ha ka 22 tarik mynta u bnai, ki Thei India ki la ïa aireng pyrshah ïa kawei na ki team ba khlaiñ jong ka Sweden bad USA ha ka WU23 3-Nations Tournament.
Kane ka jingleit ïashim bynta ka long shi bynta na ka jingïaleh ka India ban nang pyntbit shuh shuh ha ka jingïalehkai ban pynkhreh ïa ka Asian Women’s Championship.
Ka India ka la jied 23 ngut ki nongïalehkai ban ïashim bynta ha kane ka Tournament bad kine ki long ka Aditi Chauhan, ka Linthoingambi Devi, ka Shreya Hooda, ka Dalima Chhibber, ka Sweety Devi, ka Ritu Rani, ka Ashalata Devi, ka Ranjana Chanu, ka Manisa Panna, ka Arifa Sayed, ka Anju Tamang, ka Karthika Angamuthu, ka Ratanbala Devi, ka Priyangka Devi, ka Martina Thokchom, ka Santosh, ka Apurna Narzary, ka Grace Dangmei, ka Soumya Guguloth, ka Manisha, ka Pyari Xaxa, ka Renu bad Dular Marandi.
Wat lada ka jingangnud jong ka India ban ïoh rung World Cup ka la mad ïa u soh kthang hadien ba ka la hap ban weng noh na ka AFC Asian Womens Championship ha kine ki bnai baladep, namar ka jingioh pang COVID kiba bun ki nongïalehkai, hynrei ka team ka la shim ïa ka rai kaba biang bha, haba ka la leit ïashim bynta ha ka FIFA-recognised tri-nation friendly, da kaba pylliem ïa ka Egypt bad ïa ka Jordan.
Ka jingkiew jong ka jingïalehkai Phubol ki Kynthei ha India, kadei namar ka jingshimkhia ban pynlong ïa ki Tournament ha ka ri, kum ka Under 17 National Championship, ka jingsdang biang ha ka Women’s League bad kiwei kiwei. Ka Under 17 team kan ïashim bynta ha ka FIFA World Cup k aban long ha Naiwieng mynta ka snem, bad ki bor pynïad Phutbol ha India ki la thaw da ki lad ki lynti kiba thymmai bad kata ka long ban kyntiew ïa ka jingïalehkai Phutbol jong ki thei Samla ha ka ri, da kaba pynlong ïa ki Coaching Camp, ki jingïalehkai Paralok kiban ïarap ban pyntbit shuh shuh ïa ka sap ba ki nongïalehkai kila don lypa.
Nangta kum shi bynta ban pynkhreh na bynta ka FIFA U-17 Women’s World Cup mynta u snem kaban sa long ha la ïing, ka kynhun ïalehkai football ki thei U-17 ka ri kin leit ban ïakhun pyrshah ïa ka Italy ha ka jingïalehkai kaba nyngkong jong ka 6th Torneo Female Football Tournament. Katei ka jingïalehkai kan long ha ka sngi Balang (22 tarik Jylliew 2022) ha Gradisca d’Isonzo stadium, ha Italy.
Hadien ba ki la pynkhreh kilan met ha Jamshedpur, katei ka tournament kan long shi bynta ban tynjuh ïa ki thei ïalehkai dang khie kiba la pynkhreh na bynta ka FIFA U-17 Women’s World Cup kaba la pynbeit ban pynlong nadduh ka 11 tarik u Risaw 2022.
Na ka liang u Head coach u Thomas Dennerby u ngeit skhem ba ka kynhun kan lah ban ïalehkai bha.
“Ka jingpynkreh ka la long kaba biang bha. Ngi la trei shitom ha baroh ki liang la ka long ha ka bor met bad kumjuh ruh ha ki jingïalehkai. Kadei ka jingïaid lynti kaba ngi la jam na uwei u mawjam sha uwei pat, kaba la biang pura,” ong u Dennerby.
Haba kren shaphang ki kynhun ïalehkai pyrshah, u Dennerby u la ong, “Ngin ïalehkai pyrshah ïa ka Italy, bad kan dei ka jingïalehkai kaba eh bha. Kaei kaba nga khmih lynti ka long beit tang ba ngin lah ban ïalehkai bha. Ngam tip shaphang ka jingjop ne jngrem, hynrei nga kwah ban ïohi ba ka kynhun kan kiew shaphrang.”
Ka kynhun ïalehkai ki thei U-17 kin leit ïalehkai sha ka dewbah Europe ha kaba kan sa ïalehkai ruh ha ka Open Nordic Tournament WU16 ha Norway kaban sdang naduh ka 1 tarik haduh tarik Naitung. Kane kan dei ka sien kaba nyngkong, ba ka kynhun kan sa ïashim bynta ha ka lympung ïalehkai NORDIC.
Hadien ka jingjop ne ka jingseisoh ka team ki shynrang kaba la pynmih ïa ki nongïalehkai ba tbit kum u Akash Mishra, u Vikram Pratap Singh, ka Al India Football Federation (AIFF) ka la sdang sa ïa ka Indian Arrows jong ki Kynthei. Hynrei ka team jong ki Kynthei lei lei ha ka snem kaba nyngkong ka la sdang ban seisoh ha kaba ka team ka la poi ha ka kyrdan kaba hadpeng ha ka Indian Women’s League kaba dang shu dep. Ki nongialehkai kum ka Aparna Narzary bad ka Priyangka Naorem, ki la pynpaw ïa ka jingtbit jong ki naduh ka rukom rah bol, ka rukom ïalehkai, ha kaba ki la khring ïa ki khmat jong ki National Selector. Ki samla kynthei kiba dang 14 snem ki la lah ban ïashim bynta bad ïakhun ha ka lympung kaba don ka nongïalehkai ba pawnam jong ka India, ka Ashalata Devi.
Nalorkine, ka jingtrei shitom ki Coach kum u Alex Amrose, u Thomas Dennerby bad u Suren Chhetri, ka la nang ai mynsiem shuh shuh ïa ki nongïalehkai.
Ka jingseisoh ki team kum ka Gokulam Kerela FC, ka Sethu FC ha ka IWL, ka la ai mynsiem ïa kiba bun ban seng ïa ki team jong ki Kynthei. Kane ka lympung Phutbol jong ki Kynthei ka la khring ruh ïa ki nongïalehkai na shabar ri kum ka Elshaddai Acheampong bad ka Adriana Tirado,kiba la ïalehkai na ka Gokulam Kerela FC.
Shuh shuh ka jingtbit ki nongïalehkai kum ka Manisha Kalyan, kaba la ïoh thep kol ha ka jingïakhun ka India pyrshah ïa ka Brazil, ka la saphriang sha ki ri ka pyrthei, ha kaba ki Club ba pawnam kum ka Melbourne City FC, Rangers FC bad kiwei kiwei,ki la wan ban pynlong ki Camp ban jied nongïalehkai na India da kaba pynlong ka Camp ha nongbah Kolkata dang shen. Ka Manisha Kalyan,la ïathuh ba ka la ïoh jingïaroh na ki Club kiba na shabar bad ka lah ban leit mihkhmat noh na ka Club na Cyprus. Lada ka leit kan bud ha ki dienjat jong ka Bala Devi, kaba la ïoh ban mihkhmat na ka Rangers FC, nangta ka paralok jong ka ha ka team India, ka Aditi Chauhan bad ka Dalima Chibber ruh ki lah ban leit ïalehkai na ka West Ham City FC.
Ki nongialekai barim jong ka India, ki la pynpaw ba ym lah len ki thei India ki la sdang ban kiew sted ha ka Phutbol, hynrei kaei kaba ki donkam ka long ka jingpyni ïalehkai ha ki TV khnang ba kin ioh jingkyrshan na ki paidbah. Nangta ka jinglah ban pynïabate ïa ka jingïalehkai na ka ri bad na ki Club, kaban ïarap shibun eh ïa ki ba kin nang pyntbit ha ka sap kaba ki don, Nangta ka jinglah ban ïalam ïa ki nongïalehkai shabar ri ban ïakhun bad kiwei pat ki nongïalehkai ba tbit jong ka pyrthei kan ïarap shibun eh ia ki.