Shillong, Jylliew 20: Kum ka dak ka jingsakhi ïa ka jinglah jong ka ban ai ki lad jingshakri ïa ki paidbah ha kaba ïadei bad ka koit ka khiah ka Ganesh Das Government Maternal & Child Health (MCH) Hospital kaba ha Shillong ka la ïoh ïa ka khusnam ‘Bronze Quality Certification’ na ka Quality Council of India (QCI). Kane ka la long ruh kum ka jingai burom ban ithuh ïa kane ka jaka sumar hapoh ka Ayushman Bharat Pradhan Mantri Jan Arogya Yojana (AB PM-JAY) Bronze Quality Standards.
Kane ka jingïoh ïa kane ka khusnam kan long ka lynti ka ban sah kynmaw ïa kane ka jaka sumar kaba don ha Meghalaya, ha kaba kane ka pynpaw ruh ïa ka jinglah jong ka jylla ban kyntiew ïa ki lad ai jingsumar kiba donlang bad ki lad jingïada. Ïa kane ka jingithuh la ïoh hadien ba kane ka jaka sumar ka la trei khlem shongthait ban ai ki jingshakri ïa ki paidbah ka jylla bad ka jingdon ki nongsumar kiba biang.
Halor kane na ka liang ki heh ophisar napoh ka tnat ka koit ka khiah ki la ïaroh ïa ka Ganesh Das Hospital bad ka kynhun jong ka, kiba la ïoh ïa kane ka khusnam.
Ki la ong ba kane ka jaka sumar kaba shakri ïa ki longkmie bad ki khynnah ka la pynskhem ïa ka jingangnud jong ka sorkar ban pynbha ïa ki jaka sumar ha ka jylla na ka bynta ka jingdonkam ki nongshong shnong.
