Jowai, Jylliew, 20: Ka Federation of Khasi Jaiñtia & Garo People (FKJGP) Jaiñtia Hills Zone hynnin ka sngi ka la leit ban ïa kynduh ïa u Chief Engineer Public Work Department (Roads), Shillong ban dawa ba dei ban shna ïa ki kynroh rel (quardrails/safety barriers) ha baroh ki bynta ba long riat ha ki surok kiba don hapoh Jaiñtia Hills.
Kum ban shuh pynkynmaw dang ha une u bnai ba la dep ka seng ka la ïoh ban leit ïa kynduh ïa u Superintendent Engineer Jowai Circle PWD Roads, na ka bynta kane ka jingdawa ba donkam, hynrei na ka liang ka seng kam pot ïohi ïa kino kino ki jingpynkhreh ban pyntrei ïa kitei ki jingker ban ïada na ki jingjia ba sngewsih.
Kumta na ka liang ka seng ka la leit ban ïa kynduh noh ïa u Chief Engineer PWD hapor ka jingïalam u Chief Organizing Secretary ma Wompher Wann bad u Legal Secretary ma Lidar Paia Dkhar, kiba la kyrpad jur na utei u sahep ba un shimkhia mardor ïa kane ka kam. Na ka liang jong u ruh ula kular ban phah ïa kane ka jingthoh sha baroh ki Executive Engineer ba kin ïoh leh ïa kaba donkam, khnang ban shngaiñ ka leit ka wan jong ki paidbah.
