Jowai, Jylliew, 20: Ka Pnar Student Movement (PSM) Central Body ba la lamkhmat da u President Bah E. Passah ka la leit ban ïa kynduh ïa u Manager Incharge jong ki ar tylli ki kompeni Mobile kynthup ïa ka Jio bad Airtel ha kaba ïadei bad ka jingtih ïa ki nala ban bteng ïa ki waïar ha surok bah Pasyih Garampani bad ha ki surok shnong.
Ïa kane ka jingtih la sdang naduh ki bynta jong ka shnong Khonshnong haduh ban da poi sha ka shnong Saphai, West Jaiñtia Hills District kat haduh ba ka la pynjulor bad pynsniew dur ïa ki surok.
Ha u kyrwoh ba la phah Publicity Secretary u Bah H. Sayoo, la pyntip ba ka seng ka la ïoh pdiang ïa ka jingud jingnam jong ki nongshong shnong ka thaiñ kiba la pynpaw ba ki ar tylli ki kompeni mobile ki la tih ruh ïa ki surok shnong ïa kiba la shna da ki dewbilat.
“Kaba pynsngewsih ïa ki nongshong shong shnong ka long ba mynta la 2 bnai kynthih naduh ba ladep ban tih ïa ki surok na ka liang ki kompeni kim shym la pynbha shuh ne maramot ïa kaei kaba ki ladep ban pynjot la ka dei ïa ki surok ba la siang rong ne da ka dewbilat bad kane ka ktah shi katdei eh ïa ka leit ka wan jong ki paidbah ka thaiñ,” la ong u kyrwoh.
Na ka liang jong ka seng ka la leit ban dawa mardor na ki nongpynïaid jong ki ar tylli ki kompeni mobile ba ki dei ban pyndep noh ban pynbha ïa ki surok ba ladep pynjot khnang ban suk ka leit ka wan jong ki paidbah.
