Jowai, Jylliew, 20: Shi bynta ban kyntiew ïa ka rukom ai jinghikai ha ki skul kaba long katkum ka juk stad digital, mynta ka sngi Thohdieng 20 tarik haka sien ba nyngkong la sam ïa ki 200 tylli ki Computer sha ki 14 tylli ki skul hapoh ka West Jaiñtia Hills District.
Ïa kane ka prokram la pynlong da ka ophis jong u Deputy Commissioner, West Jaiñtia Hills District, Jowai hapoh ka skim Pradaan Mantri Khannij Kshetra Kalyan Yojsna (PMKKKY) ba la bei tyngka da ka District Mineral Foundation (DMF) na ka bynta ki skul Secondary bad Higher Secondary Schools.
Ïa ki Computer la sam sha ki 14 tylli ki skul da u MLA ka Jowai uba dei ruh u Chairman ka MUDA Bah Wailadmiki Shylla ha ka jingïalang ba la pynlong ha Conference Room jong ka ophis u DC.
U Bah Wailadmiki Shylla haba ai jingkren ula ban jur halor ka jingdonkam jong ka Digital Literacy ha kum kane ka juk stad mynta. Ula pynpaw ka jingsngewskhem halor kane ka sienjam ba la shim da u Deputy Commissioner kan kyntiew ïa ka pule puthi ki khynnah pule ha ka juk teknoloji.
U Bah Shylla ula ai khublei ruh ïa u Deputy Commissioner halor ka jingpyrshang jong u ban kyntiew ïa ka rukom ai jinghikai hapoh ka District. Ha ka juh ka por ula pynshlur ïa ki nonghikai ba kin ïasam lem ïa ki jingeh kaba ki ïakynduh, na ka bynta ban pynbha ïa ka pule ka puthi.
U Deputy Commissioner jong ka District u Abhinav Kumar Singh ula pyntip ha ka bynta kaba ar, yn pyntreikam ïa rukom ai jinghikai halor ka Microsoft na ka bynta uwei u nonghikai jong kawei ka skul. Ha ka juh ka por ula ban jur ban pynbun ïa ka jingpynrung kyrteng ha ka subject Computer Science namar kumba long mynta dang duna bha hapoh ka District.
Ki skul kiba ïoh jingmyntoi mynta ka sngi ki kynthup ïa ka Sohkha Government Higher Secondary School, kaba la ïoh pdiang 17 tylli. Ka Government Boys’ Higher Secondary School, Jowai ka la ïoh 23 tylli. Na ka bynta Kiang Nangbah Higher Secondary School, Jowai 26 tylli ki kor Computer.
Ïa ka Government Girls, Higher Secondary Jowai la ai 20 tylli. Ïa ka Jowai Public School Jowai bad ka UPS Sorkar Mowkaïaw & RMSA la ai mar 13 tylli. Ïa ka Shangpung RMSA Secondary School, Jowai RMSA Secondary School, Government Senior Basic & RMSA Higher Secondary School Mynso bad ka Nongtalang Government Secondary School la sam mar 12 tylli.
Katba mar 10 tylli ki Computer ïa ka Shkenpyrsit UP SSA & RMSA Secondary School, Mustem SSA UP & RMSA Secondary School, Barato Government UP & RMSA Secondary School bad Trangblang Government UP & RMSA Secondary School.
