Shi lynter surok ka Mawkyrwat pyrta ki khynnah skul ïa ka jingpyrshah ïa u drok
Mawkyrwat, Jylliew, 20: Ka Nativity Youth Centre Mawkyrwat (NYCM) ha ryngkat ka jingïatrei bad ka Ophis jong u District Social Welfare Officer (DSWO) bad ka District Child Protection Unit (DCPU) jong ka South West Khasi Hills District ha ka sngi Thohdieng ki la pynlong ka jingïaïaid paidbah na ka bynta ka “Nasha Mukt Bharat Abhiyaan” ne “ka jingïakhih ban lait na u drok ha ka ri India baroh kawei” bad kaba dei ruh shibynta ban rakhe ïa ka International Day Against Drug Abuse and Illicit Trafficking.
Shwa ban pynlong ka jingïalang paidbah ban pynshai halor ka jingthmu jong kane ka prokram, la ïoh shwa ban pynlong ka jingïa-ïaid paidbah ba la ïashimbynta da ki 6 tylli ki skul ha kaba ki la sdang ban ïa ïaid paidbah na phyllaw ka Ophis jong u District Child Protection Unit (DCPU)bad pynkut pat ha phyllaw jong ka Nativity Auditorium, Mawkyrwat ka jaka ban pynlong ïa ka prokram.
Kiba la ai jingkren ha kane ka sngi ki kynthup ïa u bah P.M. Wahlang uba dei u District Child Protection, u bah Kynphamlin Kharlyngdoh uba dei u Muktiar jong ka Supreme Court uba la ai jingpynshai ha kaba ïa dei ki aiñ ki ka nun na ka bynta ban pynshitom ïa kiba khaïi be-aiñ ïa ki kynja droks bad kumjuh ka jingkren na u bah E. Tariang uba dei u District Social Welfare Officer (DSWO) jong ka South West Khasi Hills District bad ka jingphla ne Testimony na u bah Barry Kharmalki uba lait na ka jingkyrni dih drok.
Ha kajuh hi ka sngi, na ka liang ka Khasi Jaiñtia Presbyterian Synod Sepngi Urban Mission, Counselling Centre Mawkyrwat Area ha ryngkat ka jingïatreilang bad ka District Social Welfare Office, South West Khasi Hills District mynta ka sngi ka la rakhe ïa ka International Day Against Drugs & Illicit Trafficking 2025 halor ka phang, “Breaking the Chain: Prevention, Treatment and Recovery for All” ne ka “Ka jingpynpra ïa ka kynroh: Ka jingïada, jingsumar bad jingkoit jingkhiah na ka bynta baroh”, ha ka jingïalang ba la pynlong ha Mawkyrwat Dorbar Hall, South West Khasi Hills District.
U Kongsan ha kane ka sngi u dei u bah Reniton Lyngdoh Tongkhar uba dei u MLA ka Mawkyrwat Constituency ha ryngkat ka jingdonlang u bah S.S. Marbaniang, Counsellor jong ka Urban Mission bad u Dr. Eddie Mukhi kum ki Resources Person.
Kiwei de kiba la ïa donlang ki long u Pastor E.C. Marweiñ, Director ka Urban Mission jong ka Khasi Jaintia Presbyterian Synod Sepngi bad u Pastor L.E. Jyrwa, Counselor jong ka Mawkyrwat Area kum u nongpynïaid ïa ka jingïalang ha ryngkat ka jingdonlang ki samla, ki nonghikai bad ki khynnah skul kiba la shah khot sngewbha.