Ka jingtynjuh bunsien kam dei ba eh ka jingpule hynrei dei ka jingban khia na la ïing: President KSU

Shillong, Jylliew 20 : Ka KSU – NEHU Unit ryngkat ka jingïatrei lang bad ka Hynñiewtrep Hosteller’s Union ha ka sngi Thohdieng ka la pynlong da ka Khasi General Farwell 2025 kaba dei ka jingai khublei kyrpang ïa ki samla ba la pyndep ïa ka jingpule na ka skulbah NEHU ïa kaba la pynlong ha Community Hall, NEHU.
Ha kane ka sngi la donlang naduh u President Rangbah ka KSU, Bah Lambokstarwell Marngar kum u Kongsan bad ruh u Bah Daniel Thangkhiew kum u Symbud Kongsan nalor ki nongïalam ba hakhmat jong ka KSU, NEHUSU bad KSU NEHU Unit nalor ki samla pule.
Haba kren ha ka jingïalang, u President Rangbah ka KSU, u la ong ba ka long kaba donkam ïa ki khun samla ban pynjanai ïalade ha ka jingmut jingpyrkhat bad khamtam ban puson ïalade shano kin jam ynda ki la mih noh na kane ka skul bah.
“Kane ka juk ba ngi im ka dei ka juk jong ka jingnang jingstad. Haoid phi peit ka kyrdan pule jong ka jylla ka don sha trai duh hynrei lada ngi peit pat salonsar haba ngi ïaid sawdong kylleng ka Bri u Hynñiewtrep ngi shem bad ngi lap ba bun ki ïing ki sem ki la pynshlur ïa ki khun ba kin kiew ha ka pule puthi,” u la ong.
U ong ruh ba mynshwa ki kmie ki kpa ha nongkyndong ki ong ba ki phah skul ïa ki skul tang ban nang thoh shithi samla hynrei ha kine ki sngi pat ki kmie ki kpa ki ïohi ïa ka jingkordor jong ka pule puthi, ki ïohi ba ka pule puthi ka dei ka waitlam kaban saiñdur ïa kita ki jinglong jong ki samla bad ki ïohi ruh ba ka pule puthi kadei ka bynta kaba lah ban kyrshan ïa ka ïing ka sem shisien ka sngi.
“Kum ki samla, ngi sngewthuh ba ha ka jingpule ki don ki jingpule jong phi ba phi mad ïa shibun ki jingeh bad jingtynjuh ha ka jingim. Teng teng ka jingtynjuh kam dei ba ka eh ka jingpule jong ki hynrei kadei ka jingban ka jingkhia na ïing na sem. Don ki khep ba ki sangeh noh shiteng por ïa ka jingpule. Hynrei nga don ban ong ba ka kabu ha ki briew kam wan arsien hynrei ka wan tang shisien,” u la ong.
Shuh shuh u ong ruh, “Wat ju pynlehnohei ïa ka por jong phi, wat shim ba kita ki jingeh ba kin long ki diengpyngkiang ha ka jingim jong phi hynrei ba kin long ki mawpun bad mawkyndon ba phin jam na kawei ka sngi sha kawei pat ka sngi ban poi sha ka thong kaba phi thrang.
U la ïaroh ruh ïa ki samla pule kiba wan ha katei ka skulbah ym tang ban ïoh ïa ka jingnang jingstad hynrei ruh ban kyntiew ïa ka skulbah ha baroh ki liang.
U ong ruh ha ka jingim jong ki samla khamtam ki nongïalam jong ka KSU ha skulbah NEHU khlem pep kin mad ïa ki jingtynjuh bad kin mad ïa ki jingeh. Hynrei u ong ba kidei pat ban skhem ban bah ïa ka Jaidbynriew baroh kawei.
Na ka liang u Symbud Kongsan, Bah Daniel Thangkhiew u la ïathuh ba kumno ka mynsiem ïakhun kum ki nongïalam ka seng naduh ka por ba ki dang don ha ki jaka pule kam pat lip satia wat haduh mynta mynne.
“Kam dei kaba suk ba phin poi haduh kane ka kyrdan. Ki dang don bun kiwei ki samla ki bym ïoh ïa ka lad ban pule bad pyndep kat ha ka skulbah NEHU. Ka pynkynmaw ïa nga pat sha kawei ka jingshakri ba ka KSU ka ai hapoh ka jingïalam jong Bah Lam kiba la kyrshan ïa ki samla Khasi kiba kham shemphang kham stad kiba wan na ki longïing ba duk ban pule pat ha nongbah Delhi ban ïakhun pat ïa ki eksam UPSC.” u la ong.
Shuh shuh u Bah Daniel u la ong ba ka Jaidbynriew kan im lada ki khun samla ki im. “Ngi donkam ïa ki shipai ban ïaleh ha ka seng donkam ruh kiba shemphang ba stad. Bun ki ishu kiba ka KSU ka shim ki dei kiba jop. Phi dei ban rung ha ki kam hikai, kam shakri sorkar kum ki ophisar bapher bapher khnang ba kajuh kaba phi kynduh phin ïoh pat ban ïarap ïa kiwei ïa ka jingshakri haba phi don ha ka bor bad ha ka sorkar.
U ong ruh ba ki samla ki la pynlut bad bor bad ka por bad ruh ïa ka kamai jong ki kmie ki kpa, kumta u la ong ba ka por ka la poi ba kin hap ban thom ïa ki jingeh kiba wit ha lynti ban ïakhun bad mih na kane ka jaka ban leit sha kiwei ki bynta jong ka jingim bad wanrah kylla ïa kiwei pat ki jingshakri naba bun ki donkam ïa ka jingïarap jong ki.
La ïoh ruh ïa ka jingkren na u President jong ka KSU NEHU, na ka Research Scholar Forum, Na u President NEHUSU bad ruh na u Education Secretary ka KSU Sengkmie Samla Pynkmenlang Sanmiet nalor ka jingkren ba kyrpang na u Kongsan Kyrpang, Bah Baiengskhem S Lyngdoh.
Ïa kane ka prokram la pynphuh shuh shuh da ka jingshad, jingrwai bad kiwei kiwei.