Nongpoh, Jylliew 20: Ban ïa snoh kti lang bad kiwei ki ri ka pyrthei bad khamtam hapoh ka ri India, ka Ri Bhoi District Yoga Sana Sport Association (RBDYSSA) ryngkat ka Yoga Cell ka RI Bhoi College ka la pynlong ïa ka jingrakhe ïa ka Internatioinal Yoga Day kum shi bynta ban ai jinghikai halor ki rukom ïalehkai Yoga kaba ai jingkoit jingkhiah ïa ki paidbah.
Ïa kane ka jingrakhe ïa ka International Yoga day la rakhe ha Ri Bhoi College, ha kaba ka Additional Deputy Commissioner ka Ri Bhoi, ka Ayushi Pradhan ka la shim bynta kum ka kongsan bad la sakhi lang ruh da ka jingdon lang ka Kong N. Fairly Nita Sun, SWO ka Ri Bhoi District, ka Principal ka Ri Bhoi College, ka Dr. Elizabeth Kharkongor, u Michael Mate, District Youth Officer ka Mara Uba Bharat, ki nonghikai bad ki samla pule katei ka College lem bad ki nongkitkam ka Ka Ri Bhoi District Yoga Sana Sport Association.
Lyngba jong kane ka sngi, nalor ki jingkren kiba ai jingbatai shaphang ka jingmyntoi ka jingïalehkai Yoga, ki samla pule ryngkat kiwei ki la pynlong ruh ïa ka jingki lanmet kaba dei shi bynta ka rukom lehkai Yoga kaba ai jingkoit jingkhiah ïa ki briew kiba pynlut por ha ka jingïalehkai Yoga.
Haba kren ha kane ka sngi kum ka kongsan, ka Ayushi Pradhan, ka la ïa jingïaroh ïa ka Ri Bhoi District Yoga Sana Sports Association kaba la pynlong ïa kane ka jingrakhe ïa ka International Yoga Day, kaba dei kawei na ka jingïalehkai kaba ai jingmyntoi shisha na ka bynta ka koit ka khiah bad ka pyrkhat ka pyrdaiñ.
Ka la kyntu ruh da kaba ong ,ba kane ka jaid jingïalehkai ka dei kaba la ithuh lut ha ki ri ka pyrthei khamtam ha ri India bad lada ki nongshong shnong ki don por ban ïalehkai tang 20 minit ha ka shi sngi, ka la ïarap shibun eh ban ïoh ïa ka met kaba koit kaba khiah bad kumjuh ruh ka pyrkhat ka pyrdaiñ kaba koit kaba khiah ha u briew.
